Deen-e-Islam

Deen-e-Islam

Islam Deen-e-Fitrat hai, yeh Allah ka bheja huva Deen hai, yeh har waqt hamaari rahnumaai karta hai aur hamein seedhi sachchi raah dikhaata hai. Islam hamein sikhaata hai ke Allah ek hai, us ka koi shareek nahin, us ke maan baap nahin hai, us ki koi aulaad nahin hain, woh hamesha se hai aur hamesha rahega, woh beniyaaz hai. Aur Hazrat Muhammad Mustafa ﷺ Allah ke aakhri Nabi aur Rasool hain, Aap ﷺ ke baad ab koi nabi nahin aayega, Aap ki nubuwwat rehti duniya tak ke liye hai, agar Aap ke baad koi nubuwwat ka daawa karega to woh jhoota hoga. Aur Qur'an Majeed Allah Ta'ala ki aakhri kitaab hai jo logon ki hidaayat ke liye utaari gai hai.Ab qayaamat tak insaanon ka Deen "Islam" hai. Isi ko apnaane mein Deen wa duniya ki bhalaai hai, yahi Allah ka pasandeeda Deen hai, Islam ke alaawa koi aur Deen wa mazhab Allah ke yahaan maqbool nahin hai. Khud Allah Ta'ala ne irshaad farmaaya: Beshak (motabar) Deen to Allah ke nazdeek Islam hi hai. (Sura-e-Aale imraan: 19)

Doosri jagah farmaaya: Jo koi shakhs Islam ke siwa koi aur Deen ikhtiyaar karna chaahega, to us se woh Deen qubool nahin kiya jaayega aur aakhirat mein un logon mein shaamil hoga jo sakht nuqsaan uthhaane waalen hain. (Sura-e-Aale imran: 85)
Allah Ta'ala ne Deene Islam ko Aap ﷺ par mukammal kar diya hai, Allah Ta'ala ne apni kitaab mein Deen ke mukammal ho jaane ki khush khabri di hai. Ab is mein kisi kami ya ziyaadati ki gunjaaish nahin hai. Allah Ta'ala ka irshaad hai: Aaj main ne tumhaare liye tumhaara Deen mukammal kar diya, tum par apni nemat mukammal kar di aur tumhaare liye Islam ko Deen ke taur par (hamesha ke liye) pasand kar liya. (Sura-e-Maaida: 3)

Woh hamein zindagi guzaarne ka achchha tareeqa sikhaata hai, har mod par hamaari behtar rehnumaai karta hai, Islam mein tamaam khoobiyaan aur bhalaaiyaan maujood hain, har achchhi baat ki taaleem deta hai aur har buri baat se mana karta hai. Huzoor ﷺ ne to yahaan tak farmaaya ke main is liye bheja gaya hoon ke akhlaaqi khoobiyon ko kamaal tak pahonchaadoon. (Musnade Ahmad: 8952)

Hindustaan ka ek baadshaah guzra hai, uska naam Akbar tha. us ke dimaag me yeh galat khayaal saraayat kar gaya tha ke (na'oozubillah) Huzoor ﷺ ke Deen ki kul muddat ek hazaar saal thi jo poori hogai, isi liye woh dil khol kar Islami ahkaam ko baatil karne mein mashgool ho gaya tha aur is ke liye us ne ek khud saakhta mazhab "Deen-e-Ilaahi" ki bunyaad rakhi thi, jis mein dher saari kharaabiyaan theen, us deen mein dakhil hone waalon se jo kalima padhwaaya jaata tha, us mein "Laa ilaaha illallahu" ke saath "Akbaru khaleefatullah" bhi shaamil kiya jaata tha, shaahi mahal mein naaqoos bajaaye jaate aur aag raoshan ki jaati thi, magar Namaaz, Rozah, Hajj, aur Zakaat se laaparwaahi barti jati thi, balke deewaan khaane mein kisi ki majaal na thi elaaniya namaaz padhe, Maqaam-e-Nubuwwat ki tauheen ki gai aur Meraaj wagaira ka mazaaq udaaya gaya, baadshaah ko Sajda-e-Ta'azeem kiya jaata, Qaanoon-e-Nikaah mein tabdeeli ki gai, tadfeen ke tareeqe badal daale, mulaaqaat ke waqt salaam karne ki jo Islami taaleem thi, us ko khatm kar ke naya tareeqa raaij kiya, baaz cheezein jo halaal theen, un ko haram keh diya gaya aur baaz cheezein jo haraam theen, un ko halaal keh diya, suwwar ko paak samjha jaane laga, ulama, mujtahideen aur Islami sha'aair ka mazaaq udaaya jaane laga, hatta ke sooraj wagaira ki parastish bhi ki jaane lagi.

Akbar ki is bad deeni aur Islam se doori mein us waqt ke darbaari ulama ki galat sohbat aur khushaamad ko bada dakhal tha, un mein Mulla Mubaarak ke do ladke Abul Fazl aur Faizi sar-e-fehrist the. Mash'hoor buzurg Shaikh Ahmad Sarhindi Mujaddid Alfe saani (Rahmatullah 'alaih) usi zamaane ke the, unhon ne badi hikmat ke saath is naye mazhab "Deen-e-Ilaahi" ka muqaabla kiya aur is baare mein bade kaarnaame anjaam diye.

❥❥ Share on: Email | Telegram | WhatsApp

Hajj

✿ Haj ke dinon mein Makkatul Mukarrama jaakar khaas aamaal ada karne ko "Haj" kehte hain. Haj ke aamaal ada karne ke din 5 hain: 8th Zil Hijjah se 12th Zil Hijjah tak. Haj zindagi mein sirf ek martaba farz hai. (Shaami: 8/99, Kitaabul Haj)

✿ Fazeelat : Huzoore Aqdas ﷺ ne farmaaya : Jis shakhs ne khaalis Allah Ta'ala ki raza ke waaste haj kiya aur woh is safar mein buraaiyon, nafsaani khwaahishaat aur ladaai jhagdon se door raha to woh gunaahon se is tarah paak-o-saaf hokar lautega jis tarah bachcha maan ke pet se paida hote waqt gunaahon se paak-o-saaf hota hai. (Sahih Bukhaari: 1521)

✿ Rasoole Akram ﷺ ne farmaaya: Jis shakhs ke paas khaane peene aur sawaari ka itna kharch ho jis se woh baitullah shareef jaasake phir woh haj na kare, to woh yahoodi hokar mare, ya nasraani hokar mare, Allah Ta'ala ko us ki koi parwaah nahin.(Tirmizi: 812)

✿ Ref: Deeniyat Course book

❥❥ Share on:

Email | Google+ | Telegram | WhatsApp

Allah Ta'ala ki naafarmaani ka wabaal

✺ Allah Ta'ala ne tamaam insaanon ko jin baaton par chalne ka hukum diya hai, usi ke mutaabiq chalna zaroori hai, us ke khilaaf zindagi guzaarna aur Allah Ta'ala ke hukmon ko na maanna bade nuqsaan ka zariya hai, aise logon se Allah Ta'ala sakht naaraaz ho jaate hai, insaanon par jo tarah tarah ki museebatein aur pareshaaniyaan aati hain woh Allah Ta'ala ki naafarmaani aur gunaah hi ka nateeja hota hai.

✺ Huzoor ﷺ ne farmaaya: Bande ko jo halki ya sakht museebat pesh aati hai, woh us ke gunaah ka nateeja hoti hai, aur bahot saare gunaahon ko to Allah Ta'ala maaf farma dete hain. (Tirmizi: 3252)

✺ Baarish jo ke Allah ki badi nemat hai, yeh bhi hamaare gunaahon ki wajah se ruk jaati hai, jab gunaah aur Allah ki naafarmaaniyaan hone lagti hai, to Allah Ta'ala baarish ko rok lete hain,

✺ Huzoor ﷺ ne farmaaya: Jab haakim log zulm karne lagte hain, to baarish rok li jaati hai. (Hilyatul Auliya: 5/200)

✺ Pichhli qaumon par Allah Ta'ala ki naafarmaani ki wajah se azaab bhi aachuka hai, maslan Hazrat Nooh ('Alaihissalaam) ki qaum ne jab Allah Ta'ala ki naafarmaani ki, us ke saath shirk kiya, gunaahon mein mubtila ho gai, to Hazrat Nooh ('Alaihissalaam) ne un ko samjhaaya aur sirf ek Allah ki ibaadat karne aur gunaahon ko chhodne ka hukm diya aur Allah Ta'ala ki marzi ke mutaabiq zindagi guzaarne ki hidaayat di, magar chand logon ke siwa kisi ne bhi un ki baaton ko nahin maana aur Allah Ta'ala ki naafarmaani mein had se aage badhte gaye, to Allah Ta'ala ne us qaum par apna azaab naazil kiya aur ek toofaani sailaab ke zariye tamaam kaafiron ko halaak kar diya.

✺ Isi tarah Hazrat Loot ('Alaihissalaam) ki qaum ne jab Allah Ta'ala ki naafarmaani ki, tarah tarah ki buraaiyon aur gunaah ke kaamon mein mubtila ho gai, to Hazrat Loot ('Alaihissalaam) ne un ko Allah ki naafarmaani se bachne aur gunaahon se baaz rehne ki hidaayat di, magar unhon ne nahin maana aur naafarmaani aur sarkashi mein had se aage badh gaye, to Allah Ta'ala ne Hazrat Jibraeal ('Alaihissalaam) ko bheja, unhon ne poori basti ko uthhaaya aur aasmaan ke qareeb le gaye aur waheen se poori basti ko zameen par patakh diya aur oopar se pattharon ki baarish barsaai, is tarah is holnaak azaab ke zariye poori qaum halaak ho gai. Aaj kal zameen ki khudaai ke dauraan jo khandaraat nikalte hain aur puraane zamaane ke makaanaat daryaaft hote hain, bahot mumkin hai ke Allah Ta'ala ne apne azaab ke zariye un ko zameen mein dhansa diya ho aur woh khandaraat mein tabdeel ho gaye hon.

✺ Aaj ham sab ko un waaqiaat se ibrat haasil karni chaahiye aur gunaahon se bach kar zindagi guzaarni chaahiye, aur har waqt darte rehna chaahiye ke kaheen Allah Ta'ala ke azaab mein ham bhi giraftaar na ho jaayein, Rasulullah ﷺ ne is baat ki khabar di hai ke jab Allah Ta'ala ki naafarmaani aam hogi, to us waqt Allah Ta'ala ka azaab aayega.

✺ Huzoor ﷺ ka irshaad hai: Jab Maal-e-Ganeemat ko zaati daulat banaaya jaane lage, amaanat ko ganeemat ka maal aur Zakaat ko taawaan samajh liya jaaye, ilm ko Deen ke alaawa kisi aur maqsad ke liye seekha jaane lage, log apni biwi ki farmaanbardaari kare aur apni maan ki naafarmaani karein aur doston ko apne qareeb karein aur baap ko door karein, masjidon mein aawaazein buland hon, qabeele ki sardaari un mein ka faasiq shakhs kare, qaum ka leader un mein ka kameena aadmi ho aur aadmi ka us ke shar ke dar se ikraam kiya jaaye aur gaane waaliyaan aur raag baaje aam ho jaayein aur sharaab pi jaane lage aur Ummat ke baad waale pehle logon par laanat karein, to us waqt surkh aandhiyon, zalzalon, zameen mein dhansaaye jaane, sooraton ke maskh kiye jaane aur patthar barasne ka intezaar karo aur (un ke alaawa isi tarah ki) doosri nishaaniyon ka (intezaar karo) jo lagaataar is tarah aayeingi jaise kisi haar ke dhaage ke toot jaane par us ke daane lagaataar tootne lagte hain. (Tirmizi: 2211)

❥❥ Share: Email | WhatsApp

Har ek ko salaam karna

Ek musalmaan bhai ka jab doosre musalmaan bhai se mulaaqaat hoti hai, to woh salaam karte hain. Mulaaqaat ke waqt salaam karna, Islam ka bahot hi achchha tareeqa hai, is se behtar doosra koi tareeqa nahin hai. Is ki bahot saari fazeelatein aayi hain, salaam karne se aapsi muhabbat badhti hai aur doosron se badgumaani door hoti hai, khaas taur se salaam me pahel karna bahot badi neki hai. Huzoor ﷺ ne farmaaya: Logon mein Allah Ta'ala se sab se ziyaada qareeb woh shakhs hai jo logon ko salam karne mein pahel kare. (Abu Dawood: 5197, Abu Umaama رضي الله عنه) Baaz log sirf apne jaanne pehchaanne waalon hi kon salam karte hain, yeh sahi nahin hai, Islam ki taleem ye hai ke har musalmaan bhai ko salaim kiya jaaye, khwaah un ko pehle se pehchaante ho ya na pehchaante ho. Jab kisi tarah maaloom ho jaaye ke woh musalmaan hai to us ko salaam karna chaahiye, is mein bahot sawaab hai. Huzoor ﷺ se ek shakhs ne daryaaft kiya ke ya Rasulullah ﷺ kaon sa amal behter hai? Aap ﷺ ne farmaaya: Khaana khilaana aur salaam karna, chaahe tum use pehchaante hoya na pehchaante ho. (Bukhari: 12, Abdullah bin Amr رضي الله عنه) Hamein bhi har ek ko salaam karna chaahiye, khwaah woh hamaare dost hon, ya rishtedaar ya koi doosre musalmaan bhai.

Share this on: Email | WhatsApp

Aurton ke liye baal katwaana

Aurton ke liye baal husn wa khoobsoorti ki alaamat hai, isi liye aam taur par aurtein lambe aur ghane baalon ko pasand karti hain, magar aaj ke daur mein baaz aurton ne baalon ko taraashwaana shuru kar diya hai, is ki mukhtalif shaklein banwaati hain, baaz peshaani se oopar ke baalon ko kaatti hain aur kuch khawateen mardon ki tarah chhota rakhne ki koshish karti hain, yeh sab Islami tehzeeb wa akhlaaq ke munaafi hai aur gair Islami tareeqa hai, isi liye shareef, nek, ba haya aur Deendar khawateen bhi is ko pasand nahi karti hain.

Haqeeqat yeh hai ki is amal ki wajah se aurat mardon se mushabehat ikhtiyaar karne waali ban jaati hai aur ye bahot hi khatarnaak aur halaakat wa tabaahi ka sabab hai, Huzoor ﷺ ne aisi aurton par laanat farmaai hai jo mardon ki mushaabehat ikhtiyaar karti hain. Neez is mein faasiq wa faajir logon ke saath tashabboh bhi paaya jaata hai, aur logon ki mushaabehat ikhtiyaar karne se bhi bachna zaroori hai. Is liye ke Rasulullah ﷺ ne farmaaya: Jis ne jis qaum ke sath mushaabehat ikhtiyaar ki woh unheen mein se hai. (Abu Dawood: 4031)

Isi tarah ye bhi yaad rakhna chaahiye ke abru'on aur bhawon ko taraashna ya ukhaadna, ya daantoon ko ghis kar baareek karna aur use kaat kar nokeela banaana jaisa ke aaj ke daur mein baaz aurtein karti hain, Islami sharee'at ki ru se durust nahin hai, is se bhi sab ko bachna chaahiye, kyun ke zeenat ke yeh tareeqe fitrat aur etedaal se hate huwe hain aur Allah Ta'ala ki paida karda khalqat aur shakl-o-soorat mein ek tarah ki tabdeeli hai aur Allah Ta'ala ki khalqat mein tabdeeli karna ek shaitaani kaam hai, Qur'an-e-kareem mein hai ke shaitaan ne kaha tha: Aur main logon ko hukm doonga to woh Allah ki banaai hui khalqat mein tabdeeli karenge. (Surah-e-Nisa 4: 119)

Yahaan yeh samajh lena chaahiye ke aurton ko zeenat ikhtiyaar karne se mana nahin karta hai, balke is ki ijaazat deta aur baaz martaba to is ka hukm diya hai, albatta is silsile mein kuchh hidaayetein di hain jis mein sharaafat wa gairat hai, sharm-o-haya hai, etedaal aur meyaana rawi hai aur jis ko apnaakar ek aurat shareef, nek wa Deendar aur Allah ki nazar mein mehboob ban sakti hai, is liye tamaam aurton ko Islami taur tareeqe ko apnaana chaahiye aur doosron ke tareeqon se bachne ki poori koshish karni chahiye.

Share this on: Email | WhatsApp