Kufr

Kufr: Kufr ke maani hai na maanna, Islam mein jin cheezon par iman laana zaroori hai, in mein se kisi ek ko bhi na maanna “Kufr” hai. (Sharhul Aqeedatit Tahaawiyah Li Abdillah Bin Abdir Rahman: 38/16)

Jaise koi shakhs Allah Ta’ala ki zaat ko na maane ya us ki sifaat mein se kisi sifat ka inkaar kare, ya farishton ka inkaar kare ya pichhle ambiya (‘Alaihisalaam) par naazil hone waali kitaabon ke baare mein yeh aqeeda rakhe ke woh Allah Ta’ala ki kitaabein nahin theen ya Qur’an Majeed ke kisi mazmoon ka inkaar kare ya kisi Nabi ko na maane ya paigambaron ko jhoota kahe aur un ki taraf buri baaton ko mansoob kare ya taqdeer ka inkaar kare ya aakhirat ke din, qayaamat aur Hashr-o-Nashr ka inkaar kare maslan yoon kahe ke marne ke baad dobaara zinda nahin kiya jaayega ya Allah Ta’ala ko aasmaan wa zameen ke fana karne ki qudrat nahin hai ya hisaab na hoga ya Jannat wa Jahannam ke zikr sirf logon ko khush karne ur daraane ke liye kiya gaya hai, warna haqeeqat kuchh nahin hai ya Qur’aan-e-Kareem ke qa’tee ahkaam mein se kisi hukm ke inkaar kare ya Rosoolullah (Sallallahu Alaihi Wa Sallam) ki bataai hui kisi baat ko jhutlaaye, to tamaam soorton mein woh kaafir ho jaayega.

Share on: Telegram | WhatsApp

Jahannam

Jahannam

Jahannam nihaayat hi takleef ki jagah hai, woh kaafiron aur mushrikon ke liye tayyaar ki gai hai, us mein har tarah ke azaab honge, aag ke makaan aur bistar honge, aag ki hathkadiyaan aur zanjeerien hongi, bade bade saanp aur bichchhu honge, jo jahannamiyon ko daste raheinge, khaane ke liye zaqqoom (Jahannam ka ek kaantedaar darakht) hoga, peene ke liye peep aur khaulta hua paani hoga, jo aanto ko tukde tukde kardega, Jahannam ki dahekti hui aag hogi, jo un ko jalaati rahegi, aag se itne bade bade shole utheinge, jo aalishaan mahal ke baraabar honge, jab bhi jahannamiyon ke badan ki khaal jal kar raakh hojaayegi, to us ki jagah doosri khaal badal di jaayegi, har ghadi Allah Ta'ala ka azaab un ke liye sakht hota jaayega, azaab ka ek lamha umr bhar ke aish wa raahat ko bhulaadega, na un ka azaab halka hoga aur na un ko koi mohlat di jaayegi, woh maut maangenge to un ko maut naa aayegi, hamesha ke liye woh dozakh mein rahenge.

Qur'an mein Allah Ta'ala farmaata hai (Tarjama): Aur jin logon ne kufr ki rawish apnaali hai, un ke liye dozakh ki aag hai, na to un ka kaam tamaam kiya jaayega ke woh mar hi jaaein aur na un se dozakh ka azaab halka kiya jayega. Har naashukre kaafir ko ham aisi hi saza dete hain. (Surah-e-Faatir 35: 36)

Jahannam mein sab se kam darje ka azaab yeh hoga ke jahannami ko aag ki jootiyaan ya aag ke 2 tasme pehnaaye jaayenge, jis ki wajah se us ka dimaag haandi ki tarah ublega, woh samjhega ke sab se ziyaada azaab usi ko ho raha hai, jis jahannami ke dil mein zarra baraabar iman hoga woh apne gunaah ke baqadr azaab chakh kar ya Huzoor (ﷺ) ki shafa'at se Jahannam se chhutkaara paalega.
(Bukhari 6562 Nomaan Bin Basheer Raz & Anas Bin Maalik Raz 7510)

Jahannam mein bhi alag alag darje hain, un mein mukhtalif qism ka azaab hoga, mujrim log apne apne gunaahon ke mawaafiq un mein daakhil kiye jaayeinge, jo bhi Jahannam mein daakhil hoga woh mahaz Allah Ta'ala ke Adl-o-Insaaf se daakil hoga kisi par zarra baraabar zulm na kiya jaayega.

Ham musalmaanon ka aqeeda hai ke Jahannam abhi maujood hai aur hamesha ke liye rahegi, us ke mutaalliq Qur'an -o-Hadees mein bataai hui tamaam baatein sachchi hain.

Share on: Telegram | WhatsApp

Qur'an-e-Kareem ki tilaawat karna

Qur'an-e-Kareem ki tilaawat karna

Qur'an-e-Kareem Allah Ta'ala ki taraf se naazil shuda mubaarak kalaam hai, us mein ahkaam wa ma'arif aur akhlaaq-o-aadaab bayaan kiye gaye hain, us mein duniya wa aakhirat ki kaamyaabi ke aamaal bataaye gaye hain aur woh tamaam insaanon ke liye hidaayat ka zariya hai. Yeh bahot hi ba barkat aur muqaddas kalaam hai, is ki barkatein beshumaar hain, is ke alfaaz bahot hi paakeezah aur mubaarak hain. Jo shakhs is ki tilaawat karta hai, is ke liye aakhirat mein be inteha ajr-o-sawaab hai aur is ki taaleemaat par amal karna duniya wa aakhirat ki sar bulandi aur izzat-o-asmat ka zariya hai. Woh log bahot hi khush naseeb aur sa'adatmand hain jo hamesha is ki tilaawat karte aur is ki taaleemaat par amal karte hain, is ko samajhne aur doosron ko samjhaane ki koshish mein lage rehte hain. Aise shakhs ko Allah ke Rasool ﷺ ne qaabil-e-rashk bataaya hai, chunaanche ek Hadees mein irshaad farmaaya: “Sirf 2 aadmi qaabil-e-rashk hain: Ek woh jis ko Allah ne Qur'an ki nemat ata farmaai phir woh din raat us mein laga rehta hai. Aur doosra woh khush naseeb aadmi jis ko Allah ne maal-o-daulat se nawaaza aur woh din raat us ko raahe khuda mein kharch karta rehta hai.” (Bukhari)

Qur'an-e-Kareem ki tilaawat se dil ki safaai hoti hai aur Allah ki yaad aur aakhirat ke anjaam se befikri aur gaflat door hoti hai. Hadees mein hai ke Rasullulah ﷺ ne farmaaya: Insaanon ke quloob par isi tarah zang lag jaata hai jis tarah paani lagne ki wajah se lohe par zang aajaata hai. Arz kiya gaya: Ya Rasullulah! Dilon ke zang ki safaai ki kya soorat ho sakti hai? Aap ﷺ ne farmaaya: Maut ko kasrat se yaad karna aur Qur'an-e-Kareem ki tilaawat karna. (Sho'ab-ul-Imaan: 2014)

Jaandaar ki tasweerein banaana bada gunah hai

Jaandaar ki tasweerein banaana bada gunah hai

Jaandaar ki tasweerein banaane waale ko sab se ziyaada azab hoga: Jaandaar ki tasweerein banaana bhi bahot bada gunaah hai, qayaamat ke din jaandaar ki tasweer banaane waale ko sakht tareen azaab diya jaayega. Bukhaari Shareef ki ek hadees hai: Hazrat Abdullah bin Masood (raz) kehte hain ke Rasoolullah ﷺ ne irshaad farmaaya: “Allah Ta’ala ke nazdeek sab se ziyaada azaab tasweer banaane waalon ko hoga.” (Bukhari)

Jaandaar ki jo bhi tasweer banaai jaayegi, Allah Ta’ala qayaamat ke din us mein jaan daal denge aur phir wahi tasweerein apne banaane waale ko Jahannam mein azaab dengi. Rasoolullah (saws) ne irshaad farmaaya: “Har tasweer banaane waala Jahannam mein hoga, us ne jo bhi tasweer banaai hogi, us ko ek jaandaar cheez bana di jaayegi, jo Jahannam mein us shakhs ko azaab degi.” (Muslim)

Jaandaar ki tasweerein Allah Ta’ala ko itni naapasand hain ke jis ghar mein woh tasweerein hoti hain, us mein rehmat ke farishte daakhil nahin hote hain. Bukhaari Shareef ki ek riwaayat hai ke Rasoolullah ﷺ ne irshaad farmaaya: “Farishte kisi aise ghar mein daakhil nahin hote hain, jis mein kutta ya tasaaweer hon.” (Bukhari)

Jo log apne gharon mein tarah tarah ki jaandaar cheezon ki tasweerein latka kar sajaate hain, woh is hadees par gaur kar lein ke un ka ghar kis qadr khair-o-barkat se mehroom hai.

Halaal kamaai ke fawaaid wa barkaat

Halaal kamaai ke fawaaid wa barkaat

Insaan zindagi guzaarne ke liye bahot si cheezon ka mohtaaj hai; sar chhupaane ke liye ghar ka zarooratmand hai to tan dhaankne ke liye kapde ka mohtaaj, zinda rehne ke liye roti bhi zaroori hai, goya roti, kapda, makaan insaan ki bunyaadi zaroorat hai. Jo log Allah ko nahin pechaante aur us par Imaan nahin rakhte woh apne maqsad ko haasil karne ke liye halaal wa haraam ka khayaal nahin rakhte, is liye woh sood bi khaate hain aur sharaab bhi peete hain. Doosron ka maal hadap bhi karte hain. Lekin jo log Imaan waale hain un ke liye hargiz jaaiz nahin ke woh apni zarooriyaat ko poora karne mein aazaadaana rawayya ikhtiyaar karein un ke liye halaal wa paakeeza cheezon ka ikhtiyaar karna aur haraam wa naajaaiz kamoon se bachna intehaai zaroori hai. khaas taur par apni kamaai aur rozi mein is baat ka khayaal rakhna bahot ahem hai. Har waqt yeh khayaal rakhna chaahiye ke us ke pet mein halaal hi luqma jaaye, haraam luqma na ja sake. Huzoor ﷺ ne farmaaya: Woh gosht Jannat mein na ja sakega jo haraam luqme se pala badha ho. Isi liye hadees paak mein halaal rozi ki talaash wa justaju ko farz bataaya gaya hai. Is halaal rozi ke beinteha barkaat wa fawaaid hain.

Halaal rozi ki barkat se dil mein noor paida hota hai aur nek aamaal ki taufeeq milti hai, aur duaaein qubool hoti hain, Rasoolullah ﷺ ne farmaaya: Beshak Allah Ta'ala paak hai aur paak hi ko qubool farmaate hain. (phir farmaaya ke) yaqeenan (halaal khaane ke baare mein) Allah Ta'ala ne paigambaron ko jo hukm farmaaya ke Rasoolo ! paak cheezein khaao aur nek kaam karo, wahi hukm momineen ko bhi diya ke aye Imaan waalo ! Jo paak cheezein ham ne tum ko di hain un mein se khaao. Us ke baad Huzoor ﷺ ne ek aise shakhs ka zikr kiya jo lamba safar kar raha ho, us ke baal bikhre huwe hon, jism par gard-o-gubaar ata huwa ho, aur woh aasmaan ki taraf haath uthhaaye huwe Ya Rab Ya Rab keh kar dua kar raha ho. Yeh shakhs dua to kar raha hai aur haal hai ke us ka khaana haraam hai, peena haraam hai, pahenna haraam hai aur us ko haraam giza di gai hai, to in haalaat mein us ki dua kaise qubool hogi! (Muslim)

Matlab yeh hai ke musaafir aur pareshaan aadmi ki dua qubool hoti hai. Magar haraam khaane peene ki wajah se us ki dua rad kar di jaati hai, aaj bahot se log qubool na hone ki shikaayat karte hain, un ko chaahiye ke pehle apna haal dekhhein ke kaheen haraam aamdani ka istemaal to nahin ho raha hai, agar kisi bhi tarah se haraam aamdani zindagi mein daakhil ho gai to us ki dua ki qubooliyat ruki rahegi.

Hadiye ko haqeer samajhna

Hadiye ko haqeer samajhna

Kisi insaan ko apni muhabbat aur taalluq zaahir karne ke liye kuchh dena “Hadiya” hai. Hadiya lena dena masnoon hai. Huzoor ﷺ ne is par amal karne ki targeeb di hai. Hadiya lene aur dene se aapas mein muhabbat badhti hai.

Huzoor ﷺ ne farmaaya: “Tahaadau fainnal hadiyyata tuzhibu wa harassadri” (Tirmizi: 2130)

Tarjama: Aapas mein hadiya liya diya Karo, kyun ke hadiya aur tohfa dilon se keene ko khatm kar deta hai.

Hadiye ke aadaab mein se hai ke jo cheez hadiye mein di jaaye, chaahe woh miqdaar mein kitni hi kam aur maamooli ho, phir bhi is ko poori ragbat ke saath qubool Karna chaahiye, ise haqeer na samajhna chaahiye. Baaz Aurton ki aadat hoti hai ke jab un ke paas hadiye mein koi cheez bheji jaati hai aur woh miqdaar mein kam hoti hai ya maamooli haisiyat ki cheez hoti hai to us ka shukriya ada karne k bajaaye us ko haqeer samajhti hain, yeh durust nahin hai aur Islami tareeqe ke khilaaf hai, Rasoollullah ﷺ ne farmaaya: koi padosan kisi padosan ke hadiye ko haqeer na samjhe. (Tirmizi: 2130)

Lihaaza har ek musalmaan ko shauq wa ragbat k saath hadiya qubool kar lena chaahiye, khud Huzoor ﷺ logon ki dil daari Ka bahot khayaal rakhte the. Ek martaba kisi sahaabi ne app ﷺ ki khidmat mein bataur hadiya ek naqsh-o-nigaar waali chaadar bheji, Aap ﷺ ne woh chaadar waapas farmaadi, un ke paas ek maamooli chaadar thi, Aap ﷺ ne farmaaya ke mujhe is ke badle woh chaadar de do. (Bukhari)

Faaida: Aap ﷺ ne aisa is liye farmaaya taake chaadar waapas karne ki wajah se un ka dil na toot jaaye.

Farishte

     Farishte Allah Ta’ala ki noorani makhlooq aur us ke muazzaz bande hain, woh gunaahon se paak hain, din raat Allah Ta’ala ki ibaadat mein mashgool rehte hain, jin kaamon par Allah Ta’ala ne un ko laga diya hai, un hi mein lage rehte hain, kabhi Allah Ta’ala ki nafarmaani nahin karte.

     Qur’aan mein hai: Farishte Allah ke kisi hukm mein us ki naafarmaani nahin karte aur wahi karte hain jis ka unhein hukm diya jaata hai. (Sura-e-Tahreem 66: 6)

     Farishte na mard hain na aurat, woh khaane peene ke mohtaaj nahin, un ki giza apne rab ki ibaadat wa bandagi karna aur us ke ahkaam ko baja laana hai, woh ibaadat se uktaate nahin hain, woh ibaadat se takabbur aur aar nahin karte, Allah Ta’ala ne un ko shaklein badalne ki taaqat de rakhi hai, kabhi woh insaan ki shakl mein haazir hote hain aur kabhi doosri shakl mein, aasmaanon aur zameenon ke saare intezaamaat Allah Ta’ala ne un ke supurd kiye hain. Farishte beshumaar hain, un ki tadaad Allah Ta’ala ke siwa koi nahin jaanta. Qur’aan mein hai: Aur tumhaare parwardigaar ke lashkaron (Farishton) ko us ke alaawa koi nahin jaanta. (Sura-e-Muddassir 74: 31)

Share on: Telegram | WhatsApp

Nikaah

Nikaah

Nikaah us muaamle ko kehte hain jis se mard aur aurat ek doosre ke liye halaal hojaate hain.

Fazeelat (Hadees): Rasoolullah ﷺ ka irshaad hai: Jis shakhs ne nikaah kar liya, us ne apna aadha Deen mukammal kar liya, ab use chaahiye ke baqiya aadhe Deen ke baare mein Allah Ta’ala se darta rahe. (Shoabul Imaan: 5486)

Nikaah Ibaadat hai, ambiya-e-kiraam aur auliya-e-izaam ne is ka bada ehtemaam kiya hai, nikaah jahaan miyaan biwi ke liye raahat-o-sukoon ka zariya hai, wahin bahot se khair-o-barkat ka sabab hai, nikaah ki wajah se mard wa aurat bahot se gunaahon aur buraaiyon se mahfooz hojaate hain, nikaah ka maqsad hi badkaari se hifaazat aur paak daamani hai, nek aulaad maan baap ke haq mein sadqa-e-jaariya aur magfirat ka zariya banti hai.

Note: Islam mein bewah aurton ko bhi nikaah ki targeeb di gayi hai, Nabiye Kareem ﷺؑ ne jin aurton se nikaah farmaaya tha woh sab Hazrat Aaisha (Radhiallahu ‘Anha) ke alaawa bewah ya mutallaqa theen, Hazrat Khadeeja (Radhiallahu ‘Anha) 2 shoharon ke baad Aap ﷺ ke nikaah mein sab se pehle aayein, is liye bewah se nikaah karne ko bura nahin samajhna chaahiye aur na bewah aurat ko nikaah karne mein sharm karna chaahiye, yeh mahaz baatil khayaalaat hain.

Shirk

Shirk ke maani hain shareek karna, Allah ki zaat wa sifaat mein kisi ko shareek karna "Shirk" hai.

Allah Ta’ala ki zaat mein shirk:

Allah Ta'ala ki zaat mein shirk ka matlab yeh hai ke Allah Ta'ala ke alaawa kisi aur ko bhi khuda maanna jaise Isaai Allah Ta'ala ko khuda maanne ke saath saath Hazrat Isa ('Alaihisalaam) ko khuda ka beta aur Hazrat Maryam ('Alaihisalaam) ko khuda ki biwi maante hai, to woh 3 khuda maanne ki wajah se mushrik huwe, aatish parast (aag ki pooja karne waale) 2 khuda maante hain: Ek bhalaai ka paida karne waala, doosra buraai ka paida karne waala, jis ki wajah se woh mushrik huwe aur but (Idol) parast, chaand, sooraj, aag, paani, darakht, patthar jaisi bahot si cheezon ko khuda maan kar mushrik huwe.

Allah Ta’ala ki sifaat mein shirk:

Allah Ta'ala ki sifaat mein shirk ka matlab yeh hai ke jo sifaat Allah Ta'ala ke saath khaas hain, un ko kisi doosre ke liye maanna jaise Allah Ta'ala ke alaawa kisi ko rozi dene waala aur aulaad dene waala samajhna, kisi Nabi aur Wali ke baare mein yeh aqeeda rakhna ke un ko khuda ki tarah gaib ki tamaam baaton ka ilm hai, Allah Ta'ala ki tarah kisi doosre ko Ibaadat ka mustahiq samajhna aur us ke liye ibaadat ka koi fel karna jaise kisi qabr par ya kisi buzurg ke saamne sajda karna, kisi Paigambar aur Wali ke naam ka roza rakhna aur un ke naam par jaanwar zabah karna wagaira wagaira.

Gunaahon mein kufr-o-shirk sab se bade gunah hain, kufr-o-shirk toba ke bagair hargiz maaf nahin hote, kufr-o-shirk ki haalat mein marne waala hamesha Jahannam mein rahega. Qur'an Majeed mein

Allah Ta'ala ne shirk ke baare mein farmaaya (Tarjuma): "Beshak Allah Ta'ala shirk ko maaf nahin karega aur is ke alaawa jis gunah ko jis ke liye chaahega maaf kardega." (Sura-e-Nisa 4: 116)

Aur Kufr ke baare mein farmaaya (Tarjuma): "Jin logon ne kufr kiya aur hamaari aayaton ko jhutlaaya, wahi log Jahannam waale hain, woh us mein hamesha hamesha raheinge." (Sura-e-Baqarah 2: 39)

Share on: Telegram | WhatsApp

Juwa khelna

Juwa khelna haraam hai: Zamaana-e-Jaahiliyat mein juwe ka bahot riwaaj tha, logon ka yeh ek mehboob mashgala tha. Juwe mein zaalimaana aur naajaaiz tareeqe se maal haasil kiya jaata hai, juwa insaan ko ek lamhe mein kaudiyon ka mohtaaj bana deta hai aur baaz martaba maal-o-jaaidaad se badh kar insaan ki izzat bhi khatre mein pad jaati hai; is liye Rasoolullah ﷺ ne juwe ki tamaam shaklon ko haraam qaraar diya hai aur un ko khatm farmaaya hai.

Qur’aan-e-Kareem ki Sura-e-Maaidah mein Allah Ta’ala irshaad farmaata hai:

“Aye Imaan waalo! Bila shuba sharaab, juwa, but aur juwe ke teer gandi cheezein hain, shaitaan ke kaamon mein se hain; is liye tum in se bacho, taake tum kaamiyaab ho jaao. Shaitaan to yahi chaahta hai ke sharaab aur juwe ke zariye tumhaare darmiyaan dushmani aur bugz paida kar de aur tumhein Allah ki yaad aur namaaz se gaafil kar de, to kya tum rukne waale ho. (Sura-e-Maaidah: 90, 91)

Jab yeh aayat naazil huwi thi to Sahaaba-e-Kiraam (rad) ne fauran kaha: “Aye hamaare parwardigaar ham ruk gaye”. (Musnade Ahmad: 8620, Abu Hurairah (rad))

Lekin aaj phir wahi zamaana-e-jaahiliyat laut aaya hai, hamaare darmiyaan lottery, kabootar baazi aur na jaane juwe ki kaisi kaisi shaklein raaij ho gai hain aur ham musalmaan is mein jakde huwe hain. Yaad rakhiye! Juwe ke zariye kamaaya huwa maal haraam hai.

Karaamat

     Allah Ta’ala apne nek bando ki izzat badhaane ke liye kabhi Kabhi un ke zariye aisi baatein Zaahir karaadeta hai jo aadat ke khilaaf aur mushkil hoti hain, jinhein aam log nahin kar sakte, jaise paani per chalna, hawa mein udna wagaira in baaton ko “karaamat” kehte hain. (Sharhul Aqeedatit Tahaawiyah Li Saaleh Bin Abdil Azeez: 1/670)

     Karaamat ke baare mein chand zaroori aqaaid:

1) Nek bandon aur Auliya Allah Se karaamaton Ka zaahir hona haq hai. (Sharhul Aqeedatit Tahaawiyah Li Abdillah: 92/1)

2) Wali se karaamat ka zahoor Allah ke ahkaam ki mukammal paabandi aur Huzoor ﷺ ki kaamil ittiba aur pairwi ki barkat se hota hai. (Sharhul Aqeedatit Tahaawiyah Li Saaleh Bin Abdil Azeez: 1/673)

3) Wali chaahe Allah ka kitna hi pyaara ho jaaye magar jab tak hosh-o-hawaas baaqi ho, woh shareeat ka paaband hai, Namaz, Roza aur koi Ibaadat us se maaf nahin ho jaati aur gunah ki baatein us ke liye durust nahin hoti. (Sharhul Aqeedatit Tahaawiyah Li Abdillah: 49/10)

4) Aisa shakhs jo shareeat ke khilaaf kaam kare jaise namaz na padhe ya daadhi mundaaye wagaira woh hargiz wali nahin ho sakta, chaahe us se kitni hi baatein aadat ke khilaaf zaahir hoti hon, chaahe woh hawa mein udne lage, paani par chalne lage aur tarah tarah ke ajeeb kaam kare, aadat ke khilaaf aisi baatein ya to jaadu hai ya shaitaani harkatein. (Sharhul Aqeedatit Tahaawiyah Li Saaleh Bin Abdil Azeez: 1/673)

     Ham musalmaanon ka aqeeda hai ke Auliya Allah se karaamaton ka zaahir hona haq hai aur us par hamaara imaan hai.

Share on: Telegram | WhatsApp

Fuzool Kharchi na karna

     Kisi sahi masraf mein zaroorat se ziyaada kharch karna "Fuzool kharchi" kehlaata hai , misal ke taur par hamko apna kaam karne ke liye ek qalam kaafi hai, magar ham apni badaai zaahir karne ke liye teen chaar qalam khareed lein , to yeh israaf aur fuzool kharchi hai.

     Yeh ek buri sifat hai , fuzool kharchi karne se insaan ki taaqat aur daulat donon barbaad hote hain. Aur ek waqt aisa aata hai ke unhein bahot afsos karna padhta hai, baaz martaba fuzool kharchi insaan ki kaamyaabi mein rukaawat ban jaati hai. Jo log fuzool kharchi karte hain woh aam taur se khair aur neki ke kaamon se door hote chale jaate hain aur bure kaamon mein mubtela ho jaate hain ; kiyun ke fuzool kharchi insaan ko apni khwaahish ke mutaabiq amal karne par ubhaarti hai aur galat aur naamunaasib kaam bhi kara deti hai. Islaam ne fuzool kharchi se mana kiya hai. Qur'aane kareem mein fuzool kharchi karne waalon ko shaitaan ka bhaai kaha hai.

     Allah Ta'ala ne farmaaya : Quraabatdaar (Rishtedaar) ko us ka haq dete rehna aur mohtaaj aur musaafiron ko bhi dete rehna aur (maal ko) bemauqa mat udaana, (kiyun ke) beshak bemauqa (maal) udaane waale shaitaanon ke bhaai hain aur shaitaan apne Rab ka bada naashukra hai. (Sura-e-Isra: 26, 27)

     Aaj kal mukhtalif mauqon par fuzool kharchi ki jaati hai , gharon mein beshumaar saamaan laaye jaate hain; jab ke un se kam mein zarooratein poori ho sakti hain. Huzoor ﷺ ne farmaaya: Jo shakhs fuzool kharchi karta hai to Allah Ta'ala use gareeb kar dete hain. (Musnade Bazzaar: 964)

     Shaadi biyaah mein khaas taur se bahot ziyaada kharch kiya jaata hai, haalaanke Islaam ne nikaah ko bahot aasaan banaaya hai. Huzoor ﷺ ne farmaaya ke sab se behtar shaadi woh hai jis mein sab se kam kharch ho. (Sho'bul Imaan: 6566)

     Bahre haal fuzool kharchi se har ek ko bachna chaahiye, isi mein aafiyat aur sukoon hai, duniya mein bhi aaraam wa raahat se zindagi guzarti hai aur aakhirat mein bhi. Insha Allah, chain wa sukoon naseeb hoga.

Share on: Telegram | WhatsApp

Har ek ko salaam karna

Ek musalmaan bhai ka jab doosre musalmaan bhai se mulaaqaat hoti hai, to woh salaam karte hain. Mulaaqaat ke waqt salaam karna, Islam ka bahot hi achchha tareeqa hai, is se behtar doosra koi tareeqa nahin hai. Is ki bahot saari fazeelatein aayi hain, salaam karne se aapsi muhabbat badhti hai aur doosron se badgumaani door hoti hai, khaas taur se salaam me pahel karna bahot badi neki hai. Huzoor ﷺ ne farmaaya: Logon mein Allah Ta'ala se sab se ziyaada qareeb woh shakhs hai jo logon ko salam karne mein pahel kare. (Abu Dawood: 5197, Abu Umaama رضي الله عنه) Baaz log sirf apne jaanne pehchaanne waalon hi kon salam karte hain, yeh sahi nahin hai, Islam ki taleem ye hai ke har musalmaan bhai ko salaim kiya jaaye, khwaah un ko pehle se pehchaante ho ya na pehchaante ho. Jab kisi tarah maaloom ho jaaye ke woh musalmaan hai to us ko salaam karna chaahiye, is mein bahot sawaab hai. Huzoor ﷺ se ek shakhs ne daryaaft kiya ke ya Rasulullah ﷺ kaon sa amal behter hai? Aap ﷺ ne farmaaya: Khaana khilaana aur salaam karna, chaahe tum use pehchaante hoya na pehchaante ho. (Bukhari: 12, Abdullah bin Amr رضي الله عنه) Hamein bhi har ek ko salaam karna chaahiye, khwaah woh hamaare dost hon, ya rishtedaar ya koi doosre musalmaan bhai.

Share this on: Email | WhatsApp

Qaza Namaz

Kisi bhi ibaadat ko us ke muqarrah waqt ke khatm hone ke baad ada karne ko “Qaza” kehte hain, jaise fajr ki namaaz sooraj tulu hone ke baad ada ki jaaye to yeh namaaz qaza kehlaayegi.

Allah Ta’ala ka irshaad hai: Beshak namaaz imaan waalon par waqt ki paabandi ke saath farz hai. (Qur’an: Sura-e-Nisa:103)

Is liye har farz namaaz ko us ke muqarrarah waqt hi mein ada karna zaroori hai, bagair Kisi majboori ke namaaz qaza karna gunahe kabeera hai. Rasoolullah ﷺ ka irshaad hai ke jo shakhs 2 namaazon ko bagair kisi uzr ke ek waqt mein padhe, woh kabeera gunaahon ke darwaazon mein se ek darwaazeh par pahonch gaya. (Tirmizi: 188)

Rasoolullah ﷺ ka irshaad hai: Jis shakhs ki ek bhi namaaz chhoot gai, woh aisa hai jaisa ke us ke ghar ke log aur maal-o-daulat sab chheen liya gaya ho.

Lihaaza jahaan tak hosake namaazon ko qaza karne se bachna chaahiye, agar koi namaaz qaza hojaaye to Allah Ta’ala se maafi maange, toba kare aur aainda namaaz ko qaza na karne ka pukhta iraada kare aur us namaaz ki qaza jald az jalz padhle. Hadees shareef mein hai ke jo kisi namaaz ko bhool jaaye ya namaaz ke waqt sota reh jaaye to us ki talaafi yahi hai ke jab yaad aajaaye namaaz padhle. (Muslim)

Farz aur witr namaazon ki qaza karna laazim hai. Qaza namaaz ke liye koi waqt mutayyan nahin hai. 3 makrooh auqaat (Tulu-e-Aaftaab, Zawaal-e-Aaftaab aur Guroob-e-Aaftaab) ke alaawa kisi bhi waqt qaza namaaz padh sakte hain. (Shaami: 5/312)

Gunaah

GUNAAH: Naafarmaani aur shareeat ke khilaaf kaam karne ko gunaah kehte hain. Gunaah khwaah chhote hon ya bade, insaanon ke liye duniya wa aakhirat mein tabaahi aur barbaadi ka zariya hai. Gunaahon ki wajah se insaan ka dil kaala ho jaata hai aur us se khair-o-bhalaai ke qubool karne ki salaahiyat khatm ho jaati hai.Tirmizi Shareef ki riwaayat hai: Huzoor irshaad farmaate hain:Bila shuba jab banda koi gunaah karta hai, to us ke dil par ek kaala nukta laga diya jaata hai, phir jab woh us gunaah ko chhod kar tauba wa istigfaar kar leta hai, to us ke dil ko saaf kar diya jaata hai aur agar woh us gunaah ko nahin chhodta; balke dobaara us ko karta hai, to us kaale nukte mein aur izaafa kar diya jaata hai; yahaan tak ke woh poore dil par chha jaata hai. (Tirmizi: 3334, Abu Hurairah)

Sahaaba-e-Kiraam kisi bhi gunaah ko chhota nahin samajhte the aur har qism ke gunaah se bachne ki koshish karte the .Bukhaai Shareef ki hadees hai:Ek martaba Hazrat Anas (raz) ne farmaaya ke: Tum log kuchh aise kaam karte ho jin ko tum baal se ziyaada baareek samajhte ho, haalaanke ham log Rasoolullah ﷺ ke zamaane mein unheen cheezon ko halaak wa barbaad karne waali samajhte the. (Bukhari: 6492)

Is liye ham logon ko bhi chaahiye ke har tarah ke gunaahon se bachne ki poori koshish karein.

Aurton ke liye baal katwaana

Aurton ke liye baal husn wa khoobsoorti ki alaamat hai, isi liye aam taur par aurtein lambe aur ghane baalon ko pasand karti hain, magar aaj ke daur mein baaz aurton ne baalon ko taraashwaana shuru kar diya hai, is ki mukhtalif shaklein banwaati hain, baaz peshaani se oopar ke baalon ko kaatti hain aur kuch khawateen mardon ki tarah chhota rakhne ki koshish karti hain, yeh sab Islami tehzeeb wa akhlaaq ke munaafi hai aur gair Islami tareeqa hai, isi liye shareef, nek, ba haya aur Deendar khawateen bhi is ko pasand nahi karti hain.

Haqeeqat yeh hai ki is amal ki wajah se aurat mardon se mushabehat ikhtiyaar karne waali ban jaati hai aur ye bahot hi khatarnaak aur halaakat wa tabaahi ka sabab hai, Huzoor ﷺ ne aisi aurton par laanat farmaai hai jo mardon ki mushaabehat ikhtiyaar karti hain. Neez is mein faasiq wa faajir logon ke saath tashabboh bhi paaya jaata hai, aur logon ki mushaabehat ikhtiyaar karne se bhi bachna zaroori hai. Is liye ke Rasulullah ﷺ ne farmaaya: Jis ne jis qaum ke sath mushaabehat ikhtiyaar ki woh unheen mein se hai. (Abu Dawood: 4031)

Isi tarah ye bhi yaad rakhna chaahiye ke abru'on aur bhawon ko taraashna ya ukhaadna, ya daantoon ko ghis kar baareek karna aur use kaat kar nokeela banaana jaisa ke aaj ke daur mein baaz aurtein karti hain, Islami sharee'at ki ru se durust nahin hai, is se bhi sab ko bachna chaahiye, kyun ke zeenat ke yeh tareeqe fitrat aur etedaal se hate huwe hain aur Allah Ta'ala ki paida karda khalqat aur shakl-o-soorat mein ek tarah ki tabdeeli hai aur Allah Ta'ala ki khalqat mein tabdeeli karna ek shaitaani kaam hai, Qur'an-e-kareem mein hai ke shaitaan ne kaha tha: Aur main logon ko hukm doonga to woh Allah ki banaai hui khalqat mein tabdeeli karenge. (Surah-e-Nisa 4: 119)

Yahaan yeh samajh lena chaahiye ke aurton ko zeenat ikhtiyaar karne se mana nahin karta hai, balke is ki ijaazat deta aur baaz martaba to is ka hukm diya hai, albatta is silsile mein kuchh hidaayetein di hain jis mein sharaafat wa gairat hai, sharm-o-haya hai, etedaal aur meyaana rawi hai aur jis ko apnaakar ek aurat shareef, nek wa Deendar aur Allah ki nazar mein mehboob ban sakti hai, is liye tamaam aurton ko Islami taur tareeqe ko apnaana chaahiye aur doosron ke tareeqon se bachne ki poori koshish karni chahiye.

Share this on: Email | WhatsApp

Ifat-o-Asmat ki Hifazat

Ifat-o-Asmat ki Hifazat

Ifat wa asmat sharm-o-haya aur paak-daamani aurton keliye ek qeemati zewar hai, jis ki hifaazat karna zaroori hai, jab tak aurat is ki hifaazat karti hai, poora khaandaan, balke poora muaashera paakeezah rahta hai aur Allah Ta’ala ki rehmat aur us ki madad us ke saath rahti hai, aur poore khaandaan mein us ko izzat wa ehteraam ki nigaah se dekha jaata hai.

Qur’an wa Hadees mein ifat wa asmat ki hifaazat karne aur paakdaamani ikhtiyaar karne ki badi taqeed ki gai hai. Qur’an-e-Kareem mein Allah Ta’ala ka irshad hai (Tarjama): Aur momin aurton ko yeh keh dijiye ke woh apni nigaahein neechi rakhein aur apni sharmgaahon ki hifaazat karein. (Sura-e-Noor :31)

Is ke alaawa aur aayaton mein bhi ifat wa asmat ki hifaazat ka hukm diya gaya hai aur aisi aurton ke liye gunaahon ki bakhshish aur ajre azeem dene ka waada kiya hai. Is liye har ek ko ifat wa asmat ki poori hifaazat karni chaahiye. Islaam ne aurton ko yeh hidaayat di hai ke woh parde ka poora ehtemaam karein, Libaas wa poshaak sharee’at ke mutaabiq pehnein, shaded zaroorat ke bagair ghar se baahar na niklein, agar kabhi zaroorat se gharon se nikalna ho, to nigaahein neechi rakhein aur gair mehram ko bilkul na dekhein, yeh sab is liye hai take aurton ki asmat mehfooz reh sake. Shaitaani nigaah un ki taraf na uthhe aur phir poora muaasharah paakeezah aur Deeni ban jaaye. Sharee’at ke in ehkaam par amal kar ke hi aurtein apni asmat mehfooz rakh sakti hain aur nek seerat wa akhlaaq waali aur paakdaaman ban sakti hain, is liye tamaam aurton ko dil-o-jaan se sharee’at ke in ehkaam par amal karna chaahiye, aur inheen ke mutaabiq apni zindagi guzaarni chaahiye.

Zakaat

Sone chaandi aur saamaan-e-tijaarat wagaira par agar ek saal guzar jaaye to un ka ya un ki qeemat ka 40 waan hissa kisi gareeb musalmaan ko dene ka naam “Zakaat” hai.

Namaaz Roze ki tarah Zakaat bhi musalmaanon par farz hai, farq sirf yeh hai ke Namaaz, Rozah to har gareeb aur ameer musalmaan par farz hai aur Zakaat sirf maaldaaron par farz hai. Zakaat Islam ke 5 arkaan mein se teesra rukn hai. Is ka farz hona Qur'an Shareef ki saaf daleel se saabit hai. Jo shakhs is ka inkaar kare woh musalmaan hi nahin aur jo maaldaar hote huwe Zakaat ada na kare woh sakht gunehgaar hai.

Zakaat ko musalmaanon ki pehchaan bataaya gaya hai aur Zakaat na ada karna mushrikon aur munaafiqon ki sifat bataaya gaya hai, Zakaat ada karne waalon ko Jannat mein har tarah ki nematein mileingi aur Zakaat se ji churaane waalon ko aisa dard naak azaab diya jaayega ke jis ke sunne se hi raungte khade ho jaate hain. Qur'an Shareef mein hai: Jo log sona chaandi jama karte hain aur Allah ki raah mein kharch nahin karte, unhein ek dardnaak azaab ki khushkhabri suna do ke un ka jama kiya huwa sona chaandi us din Dozakh ki aag mein tapaaya jaayega, phir un badbakhton ki peshaaniyan, karwatein aur peethhein daagi jaayegi. Aur un se kaha jaayega, yeh wahi sona chaandi hai jo tum ne jama kiya tha, ab apne jama kiye huwe ka maza chakho. (Sura-e-Tauba 9: 34, 35)

Yeh saza to Qur'an Shareef mein hai. Hadees mein bhi bahot hi sakht sazaayein bayaan ki gai hain. Pyaare Rasullulah ﷺ ne farmaaya: “Jin logon ko Allah Ta’ala ne maal diya aur woh us ki Zakaat ada nahin karte, Qayaamat ke din un ka yeh maal ek bahot hi zahreele aur ganje saanp ki shakl mein saamne aayega uski aankhonke ke paas do siyah nukhte honge woh un ki gardan mein lipat jaayega aur un ke jabdon mein noch noch kar kahega. Main tumhaara jama kiya huwa maal hoon, main tumhaara khazaana hoon”. (Bukhari: 1403)

Tauba tauba, kaisi sakht saza hai ! Kaun musalmaan hoga jo is saza ko sun kar bhi Zakaat ada na kare, Zakaat ada karne mein hamaare liye Deen-o-Duniya ki bhalaai hai, Zakaat dene se hamaara maal paak hota hai, hamaare dil se maal ki muhabbat kam hoti hai, gareeb bhaaiyon ki madad hoti hai, hamdardi ka jazba paida hota hai, maal thheek thheek taqseem ho jaata hai aur ameer-o-gareeb us se faaida uthaate hain, yeh nahin ke kuchh log to kothhiyaan banwaayein aur kuchh log daane daane ko tarsein. Pyaare Sahaaba (Raziyallahu Anhum) ka to yeh haal tha ke woh zaroorat se ziyaada ek paise bhi apne paas nahin rakhte the.

Share on: Telegram | WhatsApp

Aakhirat

     “Yaum-e-Aakhirat” ke maana baad mein aane waale din ke hain, duniya ki zindagi ke baad Aakhirat ki zindagi shuru hogi, jo kabhi khatm na hogi; us zindagi ko islami Shareeat mein “Aakhirat” kehte hain. (Tafseer Ibn-e-kaseer: 1/59)

     Duniya imtehaan ki jagah hai, duniya mein banda jo bhi achche ya bure aamaal karta hai, un ka Aakhirat mein use poora poora badla diya jaayega. Qur’aan mein hain: Chunaanche jis ne zarra baraabar koi achchaai ki hogi, woh use dekhega aur jis ne zarra baraabar koi buraai ki hogi, woh use dekhega (Surah-e-Zilzaal 99: 7,8)

     Aakhirat par Imaan laana Imaan ka ek ahem juzw hai, Aakhirat par Imaan laane ka matlab ye hai ke is duniya ki zindagi ke baad ek aur zindagi hai, wahaan insaan ko is duniya mein kiye huwe bure aamaal ki saza aur bhale aamaal ki jaza milegi. Malakul Maut ka rooh qabz karna aur marne ka baad murde se Munkar Nakeer ke sawaal wa jawaab barhaq hai. Qayaamat ki alaamaton ka ek ek kar ke paaya jaana aur us ke baad Qayaamat ka aana yaqeeni hai. Tamaam murdon ka dobaara zinda ho kar Maidaan-e-Hashr mein jama hona, hisaab wa kitaab hona, meezaan ka qaaim hona aur aamaal naamon ka wazan kiya jaana bilkul sach hai. Pul Siraat se guzarna, us ka baal se ziyaada baareek aur talwaar se ziyaada tez hona, Imaan waalon ka us par tezi se guzar jaana aur kaafiron ka Jahannam mein gir jaana haqeeqat hai. Jannat aur us mein tarah tarah ki nematein aur Dozakh aur us mein hone waali takleefein barhaq hain. (Sharahul Aqeedatit Tahawiyya Li Saaleh bin Abdul Azeez: 1/429; Attauheed Linnaashiati wal mubtadieein Li Abdil Azeez bin Muhammed: 1/68)

     Aakhirat ke baare mein Qur’an wa Hadees mein jin jin baaton ko zikr kiya gaya hai un tamaam par Imaan laana aur un ke muta’alliq bataai hui baaton ko sachcha jaanna zaroori hai.

Share on: Telegram | WhatsApp

Tauheed

     Allah ek hai, Woh apni zaat wa sifaat mein akela hai, Allah Ta’ala ki zaat wa sifaat mein koi us ke maanind nahin, woh badi qudrat waala hai, har cheez us ki qudrat se qaaim hai, woh jis ko nafa aur faaida pohnchaane ka iraada kare, tamaam insaan aur jinnaat mil kar bhi us ko nuqsaan nahin pohncha sakte aur Woh jis ko nuqsaan pohnchaane ka iraada kare, tamaam insaan aur jinnaat mil kar bhi us ko nafa nahin pohncha sakte, Qur’an mein hai: (Tarjama) Aur agar tumhein Allah koi takleef pohncha de to us ke siwa koi nahin jo use door kar de aur agar woh tumhein bhalaai pohnchaane ka iraada kar le to koi nahin hai jo us ke fazl ka rukh pher de. (Sura-e-Younus 10: 107)

     Allah Ta’ala ko kisi saamaan aur madadgaar ki zaroorat nahin, sab us ke mohtaaj hain, Woh kisi ka mohtaaj nahin, Wahi haajaton ko poora karta hai, Wahi duaaon ko sunta hai, Wahi gunaahon ko maaf karta hai, sirf Wahi Zaat bandagi aur Ibaadat ke laaiq hai aur sirf Wahi Zaat madad talab kiye jaane ke laaiq hai, Woh badi shaan waala aur azmat waala hai. Garz tauheed ka matlab yeh hai ke Allah Ta’ala jis tarah apni Zaat mein yakta hai usi tarah apni tamaam sifaat mein bhi yakta aur akela hai, us ki Zaat wa sifaat mein koi us ka shareek nahin hai, Qur’an mein hai: Koi cheez Allah Ta’ala ke maanind nahin hai. (Sura-e-Shoora 42: 11)

Share on: Telegram | WhatsApp