Gunaah

GUNAAH: Naafarmaani aur shareeat ke khilaaf kaam karne ko gunaah kehte hain. Gunaah khwaah chhote hon ya bade, insaanon ke liye duniya wa aakhirat mein tabaahi aur barbaadi ka zariya hai. Gunaahon ki wajah se insaan ka dil kaala ho jaata hai aur us se khair-o-bhalaai ke qubool karne ki salaahiyat khatm ho jaati hai.Tirmizi Shareef ki riwaayat hai: Huzoor irshaad farmaate hain:Bila shuba jab banda koi gunaah karta hai, to us ke dil par ek kaala nukta laga diya jaata hai, phir jab woh us gunaah ko chhod kar tauba wa istigfaar kar leta hai, to us ke dil ko saaf kar diya jaata hai aur agar woh us gunaah ko nahin chhodta; balke dobaara us ko karta hai, to us kaale nukte mein aur izaafa kar diya jaata hai; yahaan tak ke woh poore dil par chha jaata hai. (Tirmizi: 3334, Abu Hurairah)

Sahaaba-e-Kiraam kisi bhi gunaah ko chhota nahin samajhte the aur har qism ke gunaah se bachne ki koshish karte the .Bukhaai Shareef ki hadees hai:Ek martaba Hazrat Anas (raz) ne farmaaya ke: Tum log kuchh aise kaam karte ho jin ko tum baal se ziyaada baareek samajhte ho, haalaanke ham log Rasoolullah ﷺ ke zamaane mein unheen cheezon ko halaak wa barbaad karne waali samajhte the. (Bukhari: 6492)

Is liye ham logon ko bhi chaahiye ke har tarah ke gunaahon se bachne ki poori koshish karein.

Qaza Namaz

Kisi bhi ibaadat ko us ke muqarrah waqt ke khatm hone ke baad ada karne ko “Qaza” kehte hain, jaise fajr ki namaaz sooraj tulu hone ke baad ada ki jaaye to yeh namaaz qaza kehlaayegi.

Allah Ta’ala ka irshaad hai: Beshak namaaz imaan waalon par waqt ki paabandi ke saath farz hai. (Qur’an: Sura-e-Nisa:103)

Is liye har farz namaaz ko us ke muqarrarah waqt hi mein ada karna zaroori hai, bagair Kisi majboori ke namaaz qaza karna gunahe kabeera hai. Rasoolullah ﷺ ka irshaad hai ke jo shakhs 2 namaazon ko bagair kisi uzr ke ek waqt mein padhe, woh kabeera gunaahon ke darwaazon mein se ek darwaazeh par pahonch gaya. (Tirmizi: 188)

Rasoolullah ﷺ ka irshaad hai: Jis shakhs ki ek bhi namaaz chhoot gai, woh aisa hai jaisa ke us ke ghar ke log aur maal-o-daulat sab chheen liya gaya ho.

Lihaaza jahaan tak hosake namaazon ko qaza karne se bachna chaahiye, agar koi namaaz qaza hojaaye to Allah Ta’ala se maafi maange, toba kare aur aainda namaaz ko qaza na karne ka pukhta iraada kare aur us namaaz ki qaza jald az jalz padhle. Hadees shareef mein hai ke jo kisi namaaz ko bhool jaaye ya namaaz ke waqt sota reh jaaye to us ki talaafi yahi hai ke jab yaad aajaaye namaaz padhle. (Muslim)

Farz aur witr namaazon ki qaza karna laazim hai. Qaza namaaz ke liye koi waqt mutayyan nahin hai. 3 makrooh auqaat (Tulu-e-Aaftaab, Zawaal-e-Aaftaab aur Guroob-e-Aaftaab) ke alaawa kisi bhi waqt qaza namaaz padh sakte hain. (Shaami: 5/312)

Juwa khelna

Juwa khelna haraam hai: Zamaana-e-Jaahiliyat mein juwe ka bahot riwaaj tha, logon ka yeh ek mehboob mashgala tha. Juwe mein zaalimaana aur naajaaiz tareeqe se maal haasil kiya jaata hai, juwa insaan ko ek lamhe mein kaudiyon ka mohtaaj bana deta hai aur baaz martaba maal-o-jaaidaad se badh kar insaan ki izzat bhi khatre mein pad jaati hai; is liye Rasoolullah ﷺ ne juwe ki tamaam shaklon ko haraam qaraar diya hai aur un ko khatm farmaaya hai.

Qur’aan-e-Kareem ki Sura-e-Maaidah mein Allah Ta’ala irshaad farmaata hai:

“Aye Imaan waalo! Bila shuba sharaab, juwa, but aur juwe ke teer gandi cheezein hain, shaitaan ke kaamon mein se hain; is liye tum in se bacho, taake tum kaamiyaab ho jaao. Shaitaan to yahi chaahta hai ke sharaab aur juwe ke zariye tumhaare darmiyaan dushmani aur bugz paida kar de aur tumhein Allah ki yaad aur namaaz se gaafil kar de, to kya tum rukne waale ho. (Sura-e-Maaidah: 90, 91)

Jab yeh aayat naazil huwi thi to Sahaaba-e-Kiraam (rad) ne fauran kaha: “Aye hamaare parwardigaar ham ruk gaye”. (Musnade Ahmad: 8620, Abu Hurairah (rad))

Lekin aaj phir wahi zamaana-e-jaahiliyat laut aaya hai, hamaare darmiyaan lottery, kabootar baazi aur na jaane juwe ki kaisi kaisi shaklein raaij ho gai hain aur ham musalmaan is mein jakde huwe hain. Yaad rakhiye! Juwe ke zariye kamaaya huwa maal haraam hai.

TV Ke Nuqsaanat

TV Ke Nuqsaanat

Islaam bahot paakeezah aur achchha mazhab hai, yeh hamein tamaam buraaiyon se rokta hai aur har us cheez ke karne se mana karta hai, jis ka karna gunaah aur jis mein hamaara nuqsaan hai. "TV" ka dekhna bhi bahot bada gunaah hai. Is mein duniya ka bhi nuqsaan hai aur aakhirat ka bhi, is ko dekhne se nigaah kamzor hoti hai, akhlaaq wa aadaat kharaab hojaate hain, ghar se barkat khatm hojaati hai, rehmat ke farishte chale jaate hain aur shayaateen ghar mein aajaate hain, TV Allah Ta'ala ki yaad se gaafil kar deti hai aur insaan aakhirat ko bhool jaata hai aur jo cheez Allah ki yaad se gaafil karne waali ho aur aakhirat ko bhula dene waali ho, us se har insaan ko bachna chaahiye.

Allah Ta'ala Qur'an mein farmaata hai (Tarjama): Aur baaz aadmi aise hain, jo in baaton ki khareedaari karte hain, jo gaafil karne waali hain, taake Allah ke raaste se besoche samjhe hataadein aur us ki hansi udaaein, aise logon ke liye zillat wa ruswaai ka azaab hai. (Sura-e-Luqmaan 31: 6)

TV dekhne mein waqt bhi barbaad hota hai, haalaanke waqt Allah Ta'ala ki bahot badi aur qeemti nemat hai, kabhi bhi is ko barbaad nahin hone dena chaahiye. Huzoor (Sallallahu-'Alaihi-Wa-Sallam) ka irshaad hai: Jannat waalon ko duniya ki kisi bhi cheez ka afsos nahin hoga, sirf us lamhe par afsos hoga jo duniya mein Allah ke zikr ke bagair guzar gaya ho. (Mo'jame Kabeer: 182)

Is liye hamein waqt ki khoob qadr karni chaahiye aur sab se badi baat yeh hai ke TV dekhne se Allah Ta'ala aur hamaare Nabi (Sallallahu-'Alaihi-Wa-Sallam) bahot naaraaz hote hain. Lihaaza ham ko TV nahin dekhna chaahiye aur apne doston aur doosre musalmaanon ko bhi is se mana karna chaahiye. Agar ham aisa kareinge, to Allah Ta'ala aur hamaare Nabi (Sallallahu-'Alaihi-Wa-Sallam) bahot khush honge.

❥❥ Share on:

Email | Telegram | WhatsApp

Nikaah

Nikaah

Nikaah us muaamle ko kehte hain jis se mard aur aurat ek doosre ke liye halaal hojaate hain.

Fazeelat (Hadees): Rasoolullah ﷺ ka irshaad hai: Jis shakhs ne nikaah kar liya, us ne apna aadha Deen mukammal kar liya, ab use chaahiye ke baqiya aadhe Deen ke baare mein Allah Ta’ala se darta rahe. (Shoabul Imaan: 5486)

Nikaah Ibaadat hai, ambiya-e-kiraam aur auliya-e-izaam ne is ka bada ehtemaam kiya hai, nikaah jahaan miyaan biwi ke liye raahat-o-sukoon ka zariya hai, wahin bahot se khair-o-barkat ka sabab hai, nikaah ki wajah se mard wa aurat bahot se gunaahon aur buraaiyon se mahfooz hojaate hain, nikaah ka maqsad hi badkaari se hifaazat aur paak daamani hai, nek aulaad maan baap ke haq mein sadqa-e-jaariya aur magfirat ka zariya banti hai.

Note: Islam mein bewah aurton ko bhi nikaah ki targeeb di gayi hai, Nabiye Kareem ﷺؑ ne jin aurton se nikaah farmaaya tha woh sab Hazrat Aaisha (Radhiallahu ‘Anha) ke alaawa bewah ya mutallaqa theen, Hazrat Khadeeja (Radhiallahu ‘Anha) 2 shoharon ke baad Aap ﷺ ke nikaah mein sab se pehle aayein, is liye bewah se nikaah karne ko bura nahin samajhna chaahiye aur na bewah aurat ko nikaah karne mein sharm karna chaahiye, yeh mahaz baatil khayaalaat hain.

Hadiye ko haqeer samajhna

Hadiye ko haqeer samajhna

Kisi insaan ko apni muhabbat aur taalluq zaahir karne ke liye kuchh dena “Hadiya” hai. Hadiya lena dena masnoon hai. Huzoor ﷺ ne is par amal karne ki targeeb di hai. Hadiya lene aur dene se aapas mein muhabbat badhti hai.

Huzoor ﷺ ne farmaaya: “Tahaadau fainnal hadiyyata tuzhibu wa harassadri” (Tirmizi: 2130)

Tarjama: Aapas mein hadiya liya diya Karo, kyun ke hadiya aur tohfa dilon se keene ko khatm kar deta hai.

Hadiye ke aadaab mein se hai ke jo cheez hadiye mein di jaaye, chaahe woh miqdaar mein kitni hi kam aur maamooli ho, phir bhi is ko poori ragbat ke saath qubool Karna chaahiye, ise haqeer na samajhna chaahiye. Baaz Aurton ki aadat hoti hai ke jab un ke paas hadiye mein koi cheez bheji jaati hai aur woh miqdaar mein kam hoti hai ya maamooli haisiyat ki cheez hoti hai to us ka shukriya ada karne k bajaaye us ko haqeer samajhti hain, yeh durust nahin hai aur Islami tareeqe ke khilaaf hai, Rasoollullah ﷺ ne farmaaya: koi padosan kisi padosan ke hadiye ko haqeer na samjhe. (Tirmizi: 2130)

Lihaaza har ek musalmaan ko shauq wa ragbat k saath hadiya qubool kar lena chaahiye, khud Huzoor ﷺ logon ki dil daari Ka bahot khayaal rakhte the. Ek martaba kisi sahaabi ne app ﷺ ki khidmat mein bataur hadiya ek naqsh-o-nigaar waali chaadar bheji, Aap ﷺ ne woh chaadar waapas farmaadi, un ke paas ek maamooli chaadar thi, Aap ﷺ ne farmaaya ke mujhe is ke badle woh chaadar de do. (Bukhari)

Faaida: Aap ﷺ ne aisa is liye farmaaya taake chaadar waapas karne ki wajah se un ka dil na toot jaaye.

Halaal kamaai ke fawaaid wa barkaat

Halaal kamaai ke fawaaid wa barkaat

Insaan zindagi guzaarne ke liye bahot si cheezon ka mohtaaj hai; sar chhupaane ke liye ghar ka zarooratmand hai to tan dhaankne ke liye kapde ka mohtaaj, zinda rehne ke liye roti bhi zaroori hai, goya roti, kapda, makaan insaan ki bunyaadi zaroorat hai. Jo log Allah ko nahin pechaante aur us par Imaan nahin rakhte woh apne maqsad ko haasil karne ke liye halaal wa haraam ka khayaal nahin rakhte, is liye woh sood bi khaate hain aur sharaab bhi peete hain. Doosron ka maal hadap bhi karte hain. Lekin jo log Imaan waale hain un ke liye hargiz jaaiz nahin ke woh apni zarooriyaat ko poora karne mein aazaadaana rawayya ikhtiyaar karein un ke liye halaal wa paakeeza cheezon ka ikhtiyaar karna aur haraam wa naajaaiz kamoon se bachna intehaai zaroori hai. khaas taur par apni kamaai aur rozi mein is baat ka khayaal rakhna bahot ahem hai. Har waqt yeh khayaal rakhna chaahiye ke us ke pet mein halaal hi luqma jaaye, haraam luqma na ja sake. Huzoor ﷺ ne farmaaya: Woh gosht Jannat mein na ja sakega jo haraam luqme se pala badha ho. Isi liye hadees paak mein halaal rozi ki talaash wa justaju ko farz bataaya gaya hai. Is halaal rozi ke beinteha barkaat wa fawaaid hain.

Halaal rozi ki barkat se dil mein noor paida hota hai aur nek aamaal ki taufeeq milti hai, aur duaaein qubool hoti hain, Rasoolullah ﷺ ne farmaaya: Beshak Allah Ta'ala paak hai aur paak hi ko qubool farmaate hain. (phir farmaaya ke) yaqeenan (halaal khaane ke baare mein) Allah Ta'ala ne paigambaron ko jo hukm farmaaya ke Rasoolo ! paak cheezein khaao aur nek kaam karo, wahi hukm momineen ko bhi diya ke aye Imaan waalo ! Jo paak cheezein ham ne tum ko di hain un mein se khaao. Us ke baad Huzoor ﷺ ne ek aise shakhs ka zikr kiya jo lamba safar kar raha ho, us ke baal bikhre huwe hon, jism par gard-o-gubaar ata huwa ho, aur woh aasmaan ki taraf haath uthhaaye huwe Ya Rab Ya Rab keh kar dua kar raha ho. Yeh shakhs dua to kar raha hai aur haal hai ke us ka khaana haraam hai, peena haraam hai, pahenna haraam hai aur us ko haraam giza di gai hai, to in haalaat mein us ki dua kaise qubool hogi! (Muslim)

Matlab yeh hai ke musaafir aur pareshaan aadmi ki dua qubool hoti hai. Magar haraam khaane peene ki wajah se us ki dua rad kar di jaati hai, aaj bahot se log qubool na hone ki shikaayat karte hain, un ko chaahiye ke pehle apna haal dekhhein ke kaheen haraam aamdani ka istemaal to nahin ho raha hai, agar kisi bhi tarah se haraam aamdani zindagi mein daakhil ho gai to us ki dua ki qubooliyat ruki rahegi.

Jaandaar ki tasweerein banaana bada gunah hai

Jaandaar ki tasweerein banaana bada gunah hai

Jaandaar ki tasweerein banaane waale ko sab se ziyaada azab hoga: Jaandaar ki tasweerein banaana bhi bahot bada gunaah hai, qayaamat ke din jaandaar ki tasweer banaane waale ko sakht tareen azaab diya jaayega. Bukhaari Shareef ki ek hadees hai: Hazrat Abdullah bin Masood (raz) kehte hain ke Rasoolullah ﷺ ne irshaad farmaaya: “Allah Ta’ala ke nazdeek sab se ziyaada azaab tasweer banaane waalon ko hoga.” (Bukhari)

Jaandaar ki jo bhi tasweer banaai jaayegi, Allah Ta’ala qayaamat ke din us mein jaan daal denge aur phir wahi tasweerein apne banaane waale ko Jahannam mein azaab dengi. Rasoolullah (saws) ne irshaad farmaaya: “Har tasweer banaane waala Jahannam mein hoga, us ne jo bhi tasweer banaai hogi, us ko ek jaandaar cheez bana di jaayegi, jo Jahannam mein us shakhs ko azaab degi.” (Muslim)

Jaandaar ki tasweerein Allah Ta’ala ko itni naapasand hain ke jis ghar mein woh tasweerein hoti hain, us mein rehmat ke farishte daakhil nahin hote hain. Bukhaari Shareef ki ek riwaayat hai ke Rasoolullah ﷺ ne irshaad farmaaya: “Farishte kisi aise ghar mein daakhil nahin hote hain, jis mein kutta ya tasaaweer hon.” (Bukhari)

Jo log apne gharon mein tarah tarah ki jaandaar cheezon ki tasweerein latka kar sajaate hain, woh is hadees par gaur kar lein ke un ka ghar kis qadr khair-o-barkat se mehroom hai.

Qur'an-e-Kareem ki tilaawat karna

Qur'an-e-Kareem ki tilaawat karna

Qur'an-e-Kareem Allah Ta'ala ki taraf se naazil shuda mubaarak kalaam hai, us mein ahkaam wa ma'arif aur akhlaaq-o-aadaab bayaan kiye gaye hain, us mein duniya wa aakhirat ki kaamyaabi ke aamaal bataaye gaye hain aur woh tamaam insaanon ke liye hidaayat ka zariya hai. Yeh bahot hi ba barkat aur muqaddas kalaam hai, is ki barkatein beshumaar hain, is ke alfaaz bahot hi paakeezah aur mubaarak hain. Jo shakhs is ki tilaawat karta hai, is ke liye aakhirat mein be inteha ajr-o-sawaab hai aur is ki taaleemaat par amal karna duniya wa aakhirat ki sar bulandi aur izzat-o-asmat ka zariya hai. Woh log bahot hi khush naseeb aur sa'adatmand hain jo hamesha is ki tilaawat karte aur is ki taaleemaat par amal karte hain, is ko samajhne aur doosron ko samjhaane ki koshish mein lage rehte hain. Aise shakhs ko Allah ke Rasool ﷺ ne qaabil-e-rashk bataaya hai, chunaanche ek Hadees mein irshaad farmaaya: “Sirf 2 aadmi qaabil-e-rashk hain: Ek woh jis ko Allah ne Qur'an ki nemat ata farmaai phir woh din raat us mein laga rehta hai. Aur doosra woh khush naseeb aadmi jis ko Allah ne maal-o-daulat se nawaaza aur woh din raat us ko raahe khuda mein kharch karta rehta hai.” (Bukhari)

Qur'an-e-Kareem ki tilaawat se dil ki safaai hoti hai aur Allah ki yaad aur aakhirat ke anjaam se befikri aur gaflat door hoti hai. Hadees mein hai ke Rasullulah ﷺ ne farmaaya: Insaanon ke quloob par isi tarah zang lag jaata hai jis tarah paani lagne ki wajah se lohe par zang aajaata hai. Arz kiya gaya: Ya Rasullulah! Dilon ke zang ki safaai ki kya soorat ho sakti hai? Aap ﷺ ne farmaaya: Maut ko kasrat se yaad karna aur Qur'an-e-Kareem ki tilaawat karna. (Sho'ab-ul-Imaan: 2014)

Kufr

Kufr: Kufr ke maani hai na maanna, Islam mein jin cheezon par iman laana zaroori hai, in mein se kisi ek ko bhi na maanna “Kufr” hai. (Sharhul Aqeedatit Tahaawiyah Li Abdillah Bin Abdir Rahman: 38/16)

Jaise koi shakhs Allah Ta’ala ki zaat ko na maane ya us ki sifaat mein se kisi sifat ka inkaar kare, ya farishton ka inkaar kare ya pichhle ambiya (‘Alaihisalaam) par naazil hone waali kitaabon ke baare mein yeh aqeeda rakhe ke woh Allah Ta’ala ki kitaabein nahin theen ya Qur’an Majeed ke kisi mazmoon ka inkaar kare ya kisi Nabi ko na maane ya paigambaron ko jhoota kahe aur un ki taraf buri baaton ko mansoob kare ya taqdeer ka inkaar kare ya aakhirat ke din, qayaamat aur Hashr-o-Nashr ka inkaar kare maslan yoon kahe ke marne ke baad dobaara zinda nahin kiya jaayega ya Allah Ta’ala ko aasmaan wa zameen ke fana karne ki qudrat nahin hai ya hisaab na hoga ya Jannat wa Jahannam ke zikr sirf logon ko khush karne ur daraane ke liye kiya gaya hai, warna haqeeqat kuchh nahin hai ya Qur’aan-e-Kareem ke qa’tee ahkaam mein se kisi hukm ke inkaar kare ya Rosoolullah (Sallallahu Alaihi Wa Sallam) ki bataai hui kisi baat ko jhutlaaye, to tamaam soorton mein woh kaafir ho jaayega.

Share on: Telegram | WhatsApp

Shirk

Shirk ke maani hain shareek karna, Allah ki zaat wa sifaat mein kisi ko shareek karna "Shirk" hai.

Allah Ta’ala ki zaat mein shirk:

Allah Ta'ala ki zaat mein shirk ka matlab yeh hai ke Allah Ta'ala ke alaawa kisi aur ko bhi khuda maanna jaise Isaai Allah Ta'ala ko khuda maanne ke saath saath Hazrat Isa ('Alaihisalaam) ko khuda ka beta aur Hazrat Maryam ('Alaihisalaam) ko khuda ki biwi maante hai, to woh 3 khuda maanne ki wajah se mushrik huwe, aatish parast (aag ki pooja karne waale) 2 khuda maante hain: Ek bhalaai ka paida karne waala, doosra buraai ka paida karne waala, jis ki wajah se woh mushrik huwe aur but (Idol) parast, chaand, sooraj, aag, paani, darakht, patthar jaisi bahot si cheezon ko khuda maan kar mushrik huwe.

Allah Ta’ala ki sifaat mein shirk:

Allah Ta'ala ki sifaat mein shirk ka matlab yeh hai ke jo sifaat Allah Ta'ala ke saath khaas hain, un ko kisi doosre ke liye maanna jaise Allah Ta'ala ke alaawa kisi ko rozi dene waala aur aulaad dene waala samajhna, kisi Nabi aur Wali ke baare mein yeh aqeeda rakhna ke un ko khuda ki tarah gaib ki tamaam baaton ka ilm hai, Allah Ta'ala ki tarah kisi doosre ko Ibaadat ka mustahiq samajhna aur us ke liye ibaadat ka koi fel karna jaise kisi qabr par ya kisi buzurg ke saamne sajda karna, kisi Paigambar aur Wali ke naam ka roza rakhna aur un ke naam par jaanwar zabah karna wagaira wagaira.

Gunaahon mein kufr-o-shirk sab se bade gunah hain, kufr-o-shirk toba ke bagair hargiz maaf nahin hote, kufr-o-shirk ki haalat mein marne waala hamesha Jahannam mein rahega. Qur'an Majeed mein

Allah Ta'ala ne shirk ke baare mein farmaaya (Tarjuma): "Beshak Allah Ta'ala shirk ko maaf nahin karega aur is ke alaawa jis gunah ko jis ke liye chaahega maaf kardega." (Sura-e-Nisa 4: 116)

Aur Kufr ke baare mein farmaaya (Tarjuma): "Jin logon ne kufr kiya aur hamaari aayaton ko jhutlaaya, wahi log Jahannam waale hain, woh us mein hamesha hamesha raheinge." (Sura-e-Baqarah 2: 39)

Share on: Telegram | WhatsApp

Jahannam

Jahannam

Jahannam nihaayat hi takleef ki jagah hai, woh kaafiron aur mushrikon ke liye tayyaar ki gai hai, us mein har tarah ke azaab honge, aag ke makaan aur bistar honge, aag ki hathkadiyaan aur zanjeerien hongi, bade bade saanp aur bichchhu honge, jo jahannamiyon ko daste raheinge, khaane ke liye zaqqoom (Jahannam ka ek kaantedaar darakht) hoga, peene ke liye peep aur khaulta hua paani hoga, jo aanto ko tukde tukde kardega, Jahannam ki dahekti hui aag hogi, jo un ko jalaati rahegi, aag se itne bade bade shole utheinge, jo aalishaan mahal ke baraabar honge, jab bhi jahannamiyon ke badan ki khaal jal kar raakh hojaayegi, to us ki jagah doosri khaal badal di jaayegi, har ghadi Allah Ta'ala ka azaab un ke liye sakht hota jaayega, azaab ka ek lamha umr bhar ke aish wa raahat ko bhulaadega, na un ka azaab halka hoga aur na un ko koi mohlat di jaayegi, woh maut maangenge to un ko maut naa aayegi, hamesha ke liye woh dozakh mein rahenge.

Qur'an mein Allah Ta'ala farmaata hai (Tarjama): Aur jin logon ne kufr ki rawish apnaali hai, un ke liye dozakh ki aag hai, na to un ka kaam tamaam kiya jaayega ke woh mar hi jaaein aur na un se dozakh ka azaab halka kiya jayega. Har naashukre kaafir ko ham aisi hi saza dete hain. (Surah-e-Faatir 35: 36)

Jahannam mein sab se kam darje ka azaab yeh hoga ke jahannami ko aag ki jootiyaan ya aag ke 2 tasme pehnaaye jaayenge, jis ki wajah se us ka dimaag haandi ki tarah ublega, woh samjhega ke sab se ziyaada azaab usi ko ho raha hai, jis jahannami ke dil mein zarra baraabar iman hoga woh apne gunaah ke baqadr azaab chakh kar ya Huzoor (ﷺ) ki shafa'at se Jahannam se chhutkaara paalega.
(Bukhari 6562 Nomaan Bin Basheer Raz & Anas Bin Maalik Raz 7510)

Jahannam mein bhi alag alag darje hain, un mein mukhtalif qism ka azaab hoga, mujrim log apne apne gunaahon ke mawaafiq un mein daakhil kiye jaayeinge, jo bhi Jahannam mein daakhil hoga woh mahaz Allah Ta'ala ke Adl-o-Insaaf se daakil hoga kisi par zarra baraabar zulm na kiya jaayega.

Ham musalmaanon ka aqeeda hai ke Jahannam abhi maujood hai aur hamesha ke liye rahegi, us ke mutaalliq Qur'an -o-Hadees mein bataai hui tamaam baatein sachchi hain.

Share on: Telegram | WhatsApp

Chugli karna

Chugli karna

Chugal khori ka matlab yeh hai ke koi shakhs 2 aadmiyon ke darmiyaan jhooti sachchi baatein bayaan kare, taake un donon ke aapsi ta'alluqaat kharaab ho jaaein. Yeh Islam ki nazar mein shadeed tareen gunaahon mein se hai. Rasoolullah ﷺ ne irshaad farmaaya: “Chugal khor Jannat mein daakhil nahin hoga”.  (Muslim)

Ek martaba Huzoor ﷺ 2 qabron ke paas se guzre, Aap ﷺ ne farmaaya ke in donon qabr waalon ko azaab ho raha hai aur yeh azaab kisi aisi cheez par nahin ho raha hai, jis ko woh chhod nahin sakte the, bila shuba in ka jurm bahot bada hai, in mein se ek apne peshaab ke chheenton se nahin bachta tha aur doosra chugli khaaya karta tha. (Bukhari)

Baitulkhala ki Sunnatein

Baitulkhala ki Sunnatein

1) Sar dhhaank kar jaana. (Sunan-e-Kubra Baihaqi: 465)

2) Joota Chappal pehan kar jaana. (Sunan-e-Kubra Baihaqi: 465)

3) Dua padh kar andar jaana. (Bukhaari)

4) Pehle baayaan paaon andar rakhna. (Bukhari, Fathul Baari: 16/425)

5) Qible ki taraf na munh karna aur na peethh karna. (Abu Dawood: 8)

6) Bilkul baat na karna. (Abu Dawood: 15)

7) Khade ho kar peshaab na karna. (Ibne Majah: 309)

8) Baayein haath se istinja karna. (Bukhari: 154)

9) Istinja ke baad mitti ya saabun wagaira se achchhi tarah haath dho lena. (Abu Dawood: 45)

10) Daayein paaon se baahar aana. (Bukhaari)

11) Baahar aane ke baad dua padhna. (Ibne Majah: 300)

Padosi ke huqooq

Padosi ke huqooq

Hadees: Allah ke Rasool (Sallallahu-‘Alaihi-Wa-Sallam) ne farmaaya: Allah ki qasam woh shakhs momin nahin! Allah ki qasam woh shakhs momin nahin! Allah ki qasam woh shakhs momin nahin! kisi ne poochha: Aye Allah ke Rasool! Kaun shakhs momin nahin? Rasoolullah (Sallallahu-‘Alaihi-Wa-Sallam) ne farmaaya: Woh shakhs jis ki takleef wa sharaarat se us ka padosi mahfooz na ho. (Bukhari)

1) Padosi ke saath narmi ka muaamla karna, use koi takleef na pohnchaana.
2) Museebat ke waqt use tasalli dena aur us ki madad karna.
3) Deen aur duniya ke muaamlaat mein us ki rehnumaai karna.
4) Khaane peene aur deegar zarooriyaat ki cheezein hadiye mein dena.
5) Agar koi cheez namak, paani, bartan wagaira maange to de dena.
6) Un se takleef pohnche to us par sabr karna.

Namaaz ki taakeed

Namaaz ki taakeed

“Namaaz” Islam ka doosra rukn hai, Qur’an wa Hadees mein namaaz padhne ki sakht taakeed ki gai hai, yeh tamaam ibaadaton mein sab se afzal Ibaadat hai. Namaaz har musalmaan par farz hai aur zaahiri taur par momin aur kaafir ke darmiyaan farq karne waali cheez namaaz hi hai, goya yeh musalmaanon ki ek khaas nishaani hai.

Huzoor ﷺ ne Irshaad farmaaya: Aadmi aur kufr wa shirk ke darmiyaan Namaaz chhod dene hi ka farq hai. (Muslim)

     Islam mein Namaaz ko jitni ahmiyat di gai hai, kisi aur ibaadat ko utni ahmiyat nahin di gai hai. Namaaz ko chhodna ya us ko ada karne mein laaparwaahi karna sakht gunaah hai, is se Allah Ta’ala bahot naaraaz hote hain.

Ek Hadees mein Rasoolullah ﷺ ne farmaaya ke jo banda ehtemaam se Namaaz ada karega, to woh (Namaaz) qayaamat ke din us ke waaste noor hogi, (Jis se Qayaamat ki andheriyon mein us ko roshni milegi aur us ke Imaan waala hone aur Allah Ta’ala ka farmaan bardaar banda hone ki nishaani) aur daleel hogi aur us ke liye najaat ka zariya banegi aur jo shakhs namaaz ki adaaigi ka ehtemaam nahin karega, to woh us ke waste na noor banegi aur na daleel hogi aur na hi najaat ka zariya hogi aur woh badbakht Qayaamat mein Qaaroon, Firaon, Haamaan aur Umayya bin Khalf ke saath hoga. (Musnad-e-Ahmad: 6576)

     Is liye ham logon ko kabhi bhi namaaz nahin chhodni chaahiye. Is ko waqt par ada karne aur jamaat ke saath padhne ka poora ehtemaam karna chaahiye. Agar kabhi kisi sakht majboori ki wajah se Namaaz qaza ho jaaye, to jald se jald padh lene ki koshish karni chaahiye. Agar hum nahin padhenge, to Allah Ta’ala ham se naaraaz ho jaayeinge aur ham ko Jahannam mein daal deinge.

Naap tol mein kami karna

Naap tol mein kami karna

Naap tol mein kami karna aur dandi maarna bhi un gunaahon mein se hai jin par dardnaak azaab ki khabar di gayi hai. Sura-e-Mutaffifeen mein Allah Ta’ala Irshaad farmaata hai: Badi kharaabi hai naap tol mein kami karne waalon ki, jin ka haal yeh hai ke jab woh logon se khud koi cheez naap kar lete hain, to poori poori lete hain aur jab woh kisi ko naap kar ya tol kar dete hain to ghata kar dete hain. (Sura-e-Mutaffifeen: 1-3)

Lihaaza jab bhi kisi ko kuchh wazan kar ke dena ho, to baraabar tolna chaahiye. Sura-e-Bani Israail mein Allah Ta’ala irshaad farmaata hai:Jab kisi ko koi cheez paimaane se naap kar do, to poora naapo aur tolne ke liye sahi taraazu istemaal karo, yahi tareeqa durust hai aur isi ka anjaam behtar hai. (Sura-e-Bani Israail: 35)

Munaasib yeh hai ke insaan doosre ko kuchh naap tol kar de, to jhukta huwa tol kar de, is mein saamne waale par ehsan bhi ho jaayega aur naap tol mein kisi kami ka ehtimaal bhi nahin rahega aur yahi Huzoor ﷺ ka tareeqa tha. Hazrat Suwaid bin Qais Raziyallahu anhu farmaate hain: Ek martaba main aur mere saath ek aur shakhs Makhrafa Abdi ne bechne ke liye kuchh kapde laaye, hamaare paas Huzoor ﷺ tashreef le aaye, Us waqt ham log Mina mein the aur hamaare paas ujrat par qeemat tolne waala shakhs bhi maujood tha, Aap ne mujh se ek paaejaama khareeda aur wazan karne waale se kaha ke qeemat tol do aur zara jhukta huwa tolo (Nasai: 4592)

Allah Ta'ala par bharosa

Allah Ta'ala saari kaainaat ke khaaliq-o-maalik hain, saare aalam ka nizaam tanhe tanha khud chala rahe hain, is kaarkhaana-e- Aalam jo kuchh kisi ko milta hai woh usi ke hukm aur faisle se milta hai. Agar woh kisi ko kuchh dena chaahe aur saari duniya ke log mil kar us ko mahroom karna chaahe to woh us ko hargiz mahroom nahin kar sakte. Agar woh kisi ko mahroom kar dena chaahe aur saari duniya ke log mil kar us ko nawaazna chaahein to woh us ko hargiz nawaaz nahin sakte. Maaloom huwa ke asl nawaazne waali zaat Allah ki hai aur asl mahroom karne waali zaat Allah ki hai. Haan hamein duniya mein jo cheezein dikhaai deti hain aur ehsaas hota hai un cheezon se hamein zarooriyaat mil rahi hai, woh darasal asbaab aur zaraaye hain, un ki haisiyat is ke siwa kuchh nahin hai ke woh cheezon ka ham tak pahonchne ke liye Allah hi ke muqarrar kiye huwe sirf zariye aur raaste hain jis tarah ke gharon mein paani jin nalon ke zariye pahonchta hai woh paani pahonchaane ke sirf zariye aur raaste hain, paani ki taqseem mein un ka apna koi dakhal aur koi hissa nahi hai, isi tarah is aalme wujood mein kaarfarmaai asbaab ki bilkul nahin balke kaarfarma aur muassir sirf Allah Ta'ala ki zaat aur us ka hukm hai.

Is haqeeqat par dil se yaqeen kar ke apne tamaam maqaasid aur kaamon mein sirf Allah Ta'ala ki zaat par etemaad aur bharosa karna, usi se lav lagaana, usi ki qudrat aur usi ke karam par nazar rakhna, usi se ummeed ya khauf hona aur usi se dua karna wagaira ka naam tawakkul hai. Zaahiri asbaab wa tadaabeer ko chhod dena tawakkul ke liye laazim nahin hain. Balke asbaab ke hote huwe bhi Allah par bharosa aur etemaad karna chaahiye.

Allah Ta'ala par tawakkul wa etemaad ki ahadees mein badi taakeed aayi hai aur us ki fazeelat bataai gai hai, chunaanche Rasoolullah ﷺ ne irshaad farmaaya ke meri ummat mein se 70,000 bagair hisaab ke Jannat mein jaaeinge. Woh woh bandagaane khuda honge jo mantar nahi karaate, shugoone bad nahin lete aur apne parwardigaar par tawakkul karte hain. (Bukhari: 6472)

Ek aur hadees mein tawakkul ki targeeb dete huwe Rasulullaah ﷺ ne irshaad farmaaya ke agar tum log Allah par aisa tawakkul aur aisa etemaad karo jaisa ke us par tawakkul karne ka haq hai to tum ko woh is tarah rozi de jis tarah parindon ko deta hai, woh subah ko bhooke apne aashiyaanon se nikalte hain aur shaam ko pet bhare waapas aate hai. (Tirmizi: 2344)

Share on: 

Email | Telegram | WhatsApp

Durood Shareef padhna

Durood Shareef padhna

Durood Shareef dar asal ek dua hai, jo bande Rasool ﷺ ke haq mein Allah Ta'ala se karte hain. Yeh haqeeqat hai ke Allah Ta'ala ke baad ham par sab se ziyaada ehsaan Rasoolullah ﷺ ka hai. Aap ﷺ ne sakht museebatein bardaasht kar ke hamaari taraf seedhe raaste ki rehnumaai ki aur Allah Ta'ala ki hidaayat bandon tak pohnchaai, agar Aap ﷺ is tarah takleefein na uthhaate, to hidaayat ki roshni ham logon tak nahin pahonch sakti aur ham ek Allah ki ibaadat karne ke bajaaye kufr-o-shirk aur gumraahi mein bhatakte rehte.

Algarz hamein Imaan ki jo sab se badi daulat aur hidaayat ki sab se badi nemat haasil hui hai, woh Huzoor ﷺ ke tufail hi mein mili hai, is liye Allah Ta'ala ke baad Aap ﷺ hamaare sab se bade mohsin hain. Hamein is ehsaan ka shukriya ada karna chaahiye aur Aap ﷺ ke haq mein duaaein karni chaahiye ke Allah Ta'ala Aap ﷺ ko apni khaas rahmaton aur barkaton se nawaaze aur Aap ﷺ ke darje ziyaada se ziyaada buland kare aur isi qism ki dua ko “Durood” kehte hain.

Durood Shareef padhne ke bahot fazaail hain. Ek hadees mein Huzoor ﷺ ne farmaaya: Jo Shakhs mujh par ek dafa Durood padhega, Allah Ta'ala us par 10 rehmatein naazil farmaayeinge aur us ke 10 gunaah maaf kareinge aur us ke 10 darje buland kareinge. (Nasai: 1297, Anas bin Malik رضي الله عنه)

Ek aur Hadees mein Huzoor ﷺ ka yeh irshaad naql kiya gaya hai ke Allah Ta'ala ke bahot se farishte hain, jin ka khaas kaam yeh hai ke woh zameen mein phirte rehte hain aur mera jo ummati mujh par Durood-o-salaam bhejta hai, wo mujh tak pohnchaate rehte hain. (Sunane Nasai:1282 Abdullah رضي الله عنه) 

Share on: Email | Telegram | WhatsApp

Dayyoos par Jannat haraam hai

Dayyoos par Jannat haraam hai

Dayyoos par Jannat haraam hai: Dayyoos us shakhs ko kehte hain ji ke ghar mein bure kaam yaani zina aur zina se mut’alliq cheezein ho rahi hon aur woh shakhs is par khaamoosh rahe, rok tok na kare. Ghar ki aisi buraai par khaamoosh rehna itna bada gunaah hai ke Allah Ta’ala ne khaamoosh rehne waale shakhs par Jannat ko haraam kar diya hai, Yaani woh shakhs Jannat mein daakhil nahin hoga. Hazrat Abdullah bin Umar (rad) bayaan karte hain ke

Rasoolullah (saws) ne farmaaya: “3 shakhs aise hain ke Allah Ta’ala ne Jannat ko un par haraam kar diya hai; ek woh shakhs jo sharaab peeta hai, doosra woh shakhs jo maan baap ko takleef pohnchaata hai, teesra woh shakhs jo dayyoos hai, yaani jo apne ghar waalon mein badkaari hote dekhta hai, magar us par rok tok nahin karta hai.” (Musnad-e-Ahmad: 5372)

Tohmat lagaana

Tohmat lagaana

Kisi par tohmat lagaana: Tohmat ka matlab yeh hai ke kisi buraai ko us shakhs ki taraf mansoob karna jis ke andar waaqiatan woh buraai na ho. Yeh sirf ek gunaah nahin; balke kai gunaahon ka majmua hai, is mein jhoot bhi hai, khayaanat bhi hai aur ek shakhs ko bila wajah takleef pohnchaana bhi hai. Is liye Qur’an wa hadees mein bahot sakhti ke saath is se mana kiya gaya hai.

Qur’an-e-Kareem mein Allah Ta’ala farmaata hai (Tarjama): “Jo log paak daaman aurton par tohmat lagaayein, phir 4 gawaah le kar na aaein, to un ko 80 kode lagaao aur un ki gawaahi kabhi qubool na karo, aur woh khud faasiq hain.” (Sura-e-Noor: 4)

Is aayat se maaloom hota hai ke tohmat lagaana itna bada gunaah hai ke hamesha ke liye us ki gawaahi ko naaqaabile qubool qaraar diya gaya hai aur Allah Ta’ala ne aise shakhs ko faasiq aur gunehgaar bataaya hai. Abu Daaood Shareef ki ek riwaayat hai:

Huzoor (saws) ne irshaad farmaaya: “Jo (maalik) apne gulaam par tohmat lagaaye; haalaanke woh gulaam begunaah hai, to qayaamat ke din us maalik ko had ke taur par kode maare jaaenge.” (Abu Daaood: 5165)

Rishtedaaron ke huqooq

Rishtedaaron ke huqooq

Rasoolullah ﷺ ne farmaaya: Beshak (Lafz) “Rahim” (Jis ke maani rishtedaari ke hain) Allah Ta’ala ke naam “Rahmaan” se liya gaya hai. Yaani yeh rishtedaari Rahmaan ki rehmat ki ek shaakh hai, (aur isi nisbat se) Allah Ta’ala ne is se farmaaya: Jo tujhe jodega main use jodoonga, aur jo tujhe todega main use todoonga. (Bukhari)

Rasoolullah ﷺ ka farmaan hai: Jo shakhs yeh chaahe ke us ki rozi mein badhotri (aur barkat) ho aur us ki umar lambi ho, us ko chaahiye ke apne rishtedaaron ke Saath achchha bartaao kare. (Bukhaari)

1) Rishtedaaron ke saath achchha bartaao karna, chaahe woh hamaare saath bura bartaao karein.

2) Rishtedaaron se mulaaqaat karna aur un ki khair khabar lete rehna.

3) Apni haisiyat ke mutaabiq rishtedaaron par kharch karna.

4) Zaroorat ke waqt rishtedaaron ki jaani aur maali madad karna.

Aurton ka gair mehram mard ko na dekhna

 Aurton ka gair mehram mard ko na dekhna

✺ Islam ke nazdeek aurton ki ifat wa asmat ki badi ahemiyat hai, isi liye Islam ne is ki hifazat ka hukm diya hai aur is mukhtalif tadbeerein bataai hain. Is par amal karne ke baad hi aurton ki asmat mehfooz reh sakti hai aur nek seerat, achchhe akhlaaq, ba haya, paakdaaman aur sahi kirdaar ki maalik ban sakti hain aur is tarah poora muaasharah paakeezah ban sakta hai.

✺ Unheen tadbeeron mein se ek yeh hai ke aurtein gair mehram mardon ko na dekhein, jis tarah mardon ko ijaazat nahin hai ke naamehram aurton ko bila zaroorat dekhein, usi tarah aurton ke liye bhi zaroori hai ke woh bila zaroorat ke naamehram mardon ko na dekhein. Qur'an wa Hadees mein mardon aur aurton ko nigaah neechi rakhne ka hukm diya gaya hai,

✺ Allah Ta'ala ka irshad hai (Tarjama):

"Aur momin aurton se keh dijiye ke apni nighaahein neechi rakhein" (Surah-e-Noor: 31)

✺ Hadees mein hai ke ek martaba Umme Salma aur Hazrat Memoona (Raziyallahu 'Anha) Huzoor ﷺ ke paas baithhi hui theen, yeh donon Huzoor ﷺ ki biwiyaan hain, itne me Hazrat Abdullah bin Umme Maktoom (Raziyallahu 'Anhu) bhi wahaan aagaye, yeh ek nabeena sahaabi the, Huzoor ﷺ ne apni donon biwiyon ko hukm diya ke tum donon in se parda karo. Is par Hazrat Umme Salma (Raziyallahu 'Anha) ne kaha: Ya Rasulullah ﷺ kya woh naabeena nahin hain? Ham ko to nahin dekh rahe hain, aur na hi pechaan rahe hain, Aap ﷺ ne farmaaya: kya tum donon bhi andhi ho, kya tum unhein nahin dekh rahin ho? (Tirmizi: 2778)

✺ Gaur karna chaahiye ke ek taraf Huzoor ﷺ ki intehaai nek aur paak baaz biwiyaan theen aur doosri taraf intehaai nek sahaabi the, yahaan to kharaab niyyat ka shuba bhi nahin tha, magar is haalat mein bhi Allah ke Rasool ﷺ ne un ko parda karne ka hukm diya. To phir aaj kal jabke haalat bahot hi ziyaada kharaab hain, gunaahon ki kasrat hai, har taraf be hayaai aur be sharmi ki baatein paai jaati hain aur shaitaan insaanon ko gunaah mein mubtila karne ki poori koshish kar raha hai, to aise haalaat mein parde ki paabandi karne, nigaahein neechi rakhne aur gair mehram mardon ki taraf taak jhaank na karne ki kitni sakht zaroorat hai.

✺ Is daur mein kuchh aurton ki yeh haalat hai woh mardon ko taakti rehti hain, shaadi biyaah ke mauqe par "Salaami" ke naam par doolhe ko andar bula kar dekhti rehti hain yeh saraasar be sharmi aur be gairati hai aur gair Islaami tareeqa hai oopar ki Hadees mein gaur karein ke kitni sakhti ke saath Huzoor ﷺ ne naabeena sahaabi ko dekhne se mana farmaadiya, is liye tamaam aurton ko is par amal karna chaahiye aur gair mehram mardon ko dekhne se ijtinaab karna chaahiye.

Share on: 

Email | Telegram | WhatsApp